Me no tobali razo ndraono Gizaraʼeli Zelomo, manofu khönia Yehowa, ’Hadia zomasiʼö ubeʼe khöu?’ Imane Selomo, ’Awuyu-wuyu nasa ndraʼo, ba lö uʼila hadia zinangea ufalua. Beʼe khögu waʼatua-tua ba wondröniaʼö banuamö.’ Imane Yehowa, ’Me daʼö niʼandrömö, ba ubaliʼö fondrege zatua-tua ndraʼugö ba gulidanö ba fondrege zi kayo. Na öʼoʼö nifakhoigu, anau nosou.’

Ibörögö Selomo wamazökhi osali. Iʼogunaʼö ganaʼa, firö, eu, ba kara feremata si sökhi. So ribu ndra matua hegöi ira alawe si so nekhe-nekhe danga ba wamazökhi osali. Fitu fakhe aefa daʼö, awai mufazökhi gosali ba musarakö khö Yehowa. Ituhi danö Selomo föna nahia wameʼe sumange ba ibeʼe zumange si no ihenaigö. Mangandrö ia, ’He Yehowa, no ambö waʼebua gosali andre moroi ba waʼasökhimö, hizaʼi tema zumange nibeʼema ba fondrondrongo wangandröma.’ Hadia omasi Yehowa gosali andrö hegöi fangandrö Zelomo? Me no aefa mangandrö Zelomo, so galitö nibeʼe Yehowa moroi ba zorugo ba ikhozi fefu zumange si so ba nahia zumange andrö, tandra wa omasi Yehowa. Omuso dödö ndraono Gizaraʼeli me laʼila daʼö.

Tehöngö misa Zelomo hegöi ba Gizaraʼeli börö waʼatua-tuania. Asese mangandrö tolo khönia niha na so gabula dödöra. No möi khönia ratu moroi ba Zeba ba wanandraigö yaʼia faoma fanofu-nofu sabua. Hizaʼi, me irongo wanema li nibeʼe Zelomo, ifuli imane, ’No urongo ndraʼugö ba zilalö ba lö faduhu dödögu. Abölö atua-tua ndraʼugö moroi ba nidunö-dunö niha. No ifahowuʼö ndraʼugö Lowalangiu Yehowa.’ Sökhi waʼauri ndraono Gizaraʼeli ba omuso dödöra. Hizaʼi, ba zi sabata ifuli tebulö daʼö.