Etyi Salomau akala ohamba yo Isilayeli, Jeova emupopila okuti: ‘Oityi uhanda ndyikuavele?’ Salomau ati: ‘Ame ndyimukuendye, hityii oñgeni mandyilingi. Mbambavo mphevo enoñgonoko opo ndyityivile okuhongolela ovanthu ava.’ Jeova emupopila okuti: ‘Mokonda waita enoñgonoko, mokala omulume omunongo vali kovanthu aveho. Iya tupu mandyikuavela olumono. Ankho utavela kuame, mokalako nomuenyo omuwa momuvo omunyingi.’

Salomau atungu ondyuo ya Jeova. Aundapesa oolu, nopalata, nomamanya. Ovalume ovanyingi novakai ovanongo vatungile ondyuo ya Jeova. Aitungwa momanima epandu-vali, aipakulwa ku Jeova. Salomau apake otyinyama komutala wovilikutila atalama ponthele yomutala elikuambela okuti: ‘Jeova ove ñgeno ulingilwa ondyuo onene yapona pwei, mahi mbambavo tavela efendelo lietu tupu tehelela omalikuambelo etu.’ Oñgeni Jeova atala ondyuo oyo nelikuambelo lia Salomau? Etyi Salomau amana okulinga elikuambelo, peulu apatoko otupia atuyoko otyinyama tyikahi komutala wovilikutila. Jeova wapanda ondyuo yae. Etyi ova Isilayeli vetyimona, avahambukwa.

Ohamba Salomau ankho iiwe mo Isilayeli aiho no movilongo ovikuavo mokonda younongo wae. Ovanthu ankho veya ku Salomau opo evekuateseko okutetulula ovitateka viavo. Alo umwe onkhai-hamba yo ko Saba yeile ku Salomau opo imulinge omapulo amwe alema. Etyi eiva omakumbululo ae, onkhai-hamba aiti: ‘Etyi ovanthu ankho vapopia konthele yove ankho hetyitavelele, pahe netyimona umwe okuti ounongo wove wapona puetyi vapopia. Huku yove, Jeova, wekuyamba.’ Omuenyo wo va Isilayeli ankho ukahi nawa iya ovanthu ankho vena ehambu. Mahi ovipuka avipiluluka.