Mɔɔ Sɔlɔmɔn rayɛle Yizilayɛma belemgbunli la, Gyihova bizale ye kɛ: ‘Duzu a ɛkulo kɛ meyɛ memaa wɔ a?’ Sɔlɔmɔn buale kɛ: ‘Mele kakula, menze ɛhwee. Mesɛlɛ wɔ, maa me nrɛlɛbɛ maa menva menzie wɔ menli ne.’ Gyihova hanle kɛ: ‘Kɛmɔ wɔbiza nrɛlɛbɛ la ati, mebamaa wɔ nrɛlɛbɛ mɔɔ tɛla awie biala ɛdeɛ wɔ azɛlɛ ye azo la. Eza mebamaa wɔanyia ɛ nwo. Na saa ɛtie me a, ɛbanyi wɔahyɛ.’

Sɔlɔmɔn bɔle ɔ bo kɛ ɔsi ɛzonlenlɛ sua ne. Ɔvale nvutuke, dwɛtɛ fufule nee awolɛ mɔɔ le ngɛnlɛma la. Mrenyia nee mraalɛ mɔɔ ze gyima ne anye zo kpalɛ la dɔɔnwo boale. Ɛvolɛ nsuu anzi, bɛzile sua ne bɛwiele na bɛdule bɛmaanle Gyihova. Ɛnee afɔlemokyea wɔ ɛkɛ yɛɛ afɔlebɔlɛ ninyɛne gua zolɛ. Sɔlɔmɔn hotole afɔlemokyea ne anyunlu na ɔzɛlɛle Gyihova kɛ: ‘O Gyihova, ɛzonlenlɛ sua ye le ekyi maa wɔ, anzɛɛ ɔnle kɛnlɛma kɛmɔ ɛkpondɛ ye la, noko tie yɛ nzɛlɛlɛ na die yɛ ɛzonlenlɛ to nu.’ Kɛzi Gyihova bule ɛzonlenlɛ sua ne nee Sɔlɔmɔn asɔneyɛlɛ ne ɛ? Mɔɔ Sɔlɔmɔn wiele ye asɔneyɛlɛ ne la, senle vi anwuma rayelale bɛ afɔlebɔdeɛ ne. Gyihova liele ɛzonlenlɛ sua ne dole nu. Mɔɔ Yizilayɛma nwunle ɛhye la, bɛ nye liele kpole.

Belemgbunli Sɔlɔmɔn nrɛlɛbɛ ne anwo edwɛkɛ dɛlɛle Yizilayɛ amuala nee maanle mɔɔ wɔ moamoa bɔbɔ la anu. Saa menli lɛ ngyegyelɛ a, bɛba Sɔlɔmɔn ɛkɛ bɛmaa ɔboa bɛ. Hyiba belemgbunli raalɛ ne bɔbɔ vale kpuya bie mɔ mɔɔ kye adwenle la razɔle ye nleanle. Mɔɔ ɔdele Sɔlɔmɔn mualɛ ne la, ɔhanle kɛ: ‘Meanlie mɔɔ mendele la meanli, noko kɛkala, menwu kɛ ɛze nrɛlɛbɛ ɛtɛla kɛzi bɛka ye bɔbɔ la. Gyihova wɔ Nyamenle ne ɛyila wɔ.’ Ninyɛne hɔle boɛ maanle Yizilayɛma, na awie biala anye liele. Noko ɛnee ɔnrɛhyɛ na ninyɛne ahakyi.