Israel llajtata Salomón mandai callarijpimi Jehová Diosca ¿imatataj cuchun munanguiman? nishpa tapurca. Salomonca, ‘huambraraj cashcamanta ima shina mandanataca mana yachanichu. Cambaj llajtata alli mandangapajca yachaita cuhuayari’ nircami. Diosca, ‘can mañashca shinami yachaisapata rurasha. Can shina yachajca pi mana tiyangachu. Achca charijpishmi tucungui. Ñuca mandashcacunata cazushpaca unitami causangui’ nircami.

Salomonca orohuan, platahuan, caspihuan, achca valij rumicunahuanmi Diospaj huasita rurai callarirca. Achcata yachaj cꞌaricuna, huarmicunami trabajarcacuna. Chai huasitaca 7 huatacunapimi tucuchircacuna. Chai huasita Diospaj maquipi mingana punlla chayajpimi altar jahuapi ofrendacunata churarcacuna. Qꞌuipaca Salomonca altar ñaupajpi cungurishpami Diostaca, ‘cai huasitapish ashtahuan yalli jatun sumajtamari chasquipaj cangui. Chashna cajpipish ñucanchij adoracionta, mañaicunata chasquipai’ nishpa mañarca. ¿Diosca chai huasitaca munarcachu? ¿Salomón mañashcataca uyarcachu? Ari. Salomón tucui mañancami jahua pachamanta nina shamushpa altar jahuapi tiyacuj ofrendacunata rupachirca. Chashnami Diosca chai huasita munashcata ricuchirca. Israelitacuna chaita ricushpaca achcatami cushicurcacuna.

Salomón yachaisapa cashcataca tucui ladocunapimi yachaj chayarcacuna. Israelitacunaca paicunapaj llaquicunata allichichunmi paipajman rijcuna carca. Seba llajtata mandaj huarmica Salomón yachaisapa cashcata ricungapajmi sinchi tapuicunata rurangapaj rirca. Salomón paipaj tapuicunata cutichijpica, ‘can yachaisapa cashcataca mana crircanichu. Pero cunanca ñuca uyashcatapish yalli yachaisapa cashcatami yachani. Cambaj Dios Jehovami bendiciashca’ nircami. Israelpica tucuicunami cushilla alhajata causacurcacuna. ¿Pero chashnachu causashpa catishca canga?