Salomon kamachiyta qallaykuptinmi Jehova Dios tapurqa: “¿Ima qunaytataq munanki?”, nispa. Chaymi Salomon nirqa: “Warmaraq kasqayraykum ima ruwaytapas manaraq anchatachu yachani. Ama hina kaspayá llaqtaykita allinta kamachinaypaq yachayta quykuway”, nispa. Diosñataqmi nirqa: “Yachaytaqa qusqaykim. Yanapasqaykitaqmi apu kanaykipaqpas. Kasukuspaykiqa unay watataqmi kawsakunkipas”, nispa.

Hinaptinmi Salomonqa Diospa wasinta qurikunawan, llipipipiq rumikunawan hinaspa allinnin qirukunawan ruwarqa. Chaypiqa allin llamkaq qarikunawan warmikunam yanapakuspanku 7 watapi qispirachirqaku. Tukuruspankuñataqmi Jehova Diospaq altarpi animalkunata kañapurqaku, hinaptinmi Salomonqa qunqurakuykuspan Diosta nirqa: “Taytallayku Jehova, kay wasiki ruwasqayku taksalla kaptinpas chaskiykullawaykuyá”, nispa. Mañakuyta tukuruptillanmi Diosqa hanaq pachamanta ninata kachaykamuspan altarpa hawanpi animalkunata ruparachirqa. Chaywanmi qawachirqa ruwasqankuwan kusikusqanta, chaymi Israel runakunapas anchata kusikurqaku.

Salomonqa ancha riqsisqataqmi rikurirurqa, chaymi achka runakuna Salomonman riqku sasachakuyninkuta allichanankupaq. Saba nacionmanta kamachiq warmipas sasa tapukuykunata ruwananpaqmi rirqa. Salomonpa ima nisqanta uyariykuspanmi chay warmiqa nirqa: “Kunanqa yachaniñam ancha yachayniyuq kasqaykita. Jehova Diosnikim yanapachkasunki”, nispa. Chay tiempopiqa kusisqam kawsakurqaku Israel runakunaqa, watakunapa risqanman hinam ichaqa manaña chaynachu karqa.