Salomón Israelpi kamachiyta qallarishaqtinmi Diosqa tapuran: “¿Imatan munanki qonayta?”, nispa. Salomontaq kutichiran: “Waynallaraqmi kani, manan imatapas allintaqa ruwanichu. Yachayta qoykuway llaqtaykita cuidanaypaq”, nispa. Diostaq niran: “Yachaytaqa qosaykin, jinan llapa runamanta aswan yachayniyoq kanki. Chaymantapas qhapaqyachisaykin, kasuwaspaykiqa askha watan kausanki”, nispa.

Jinan Salomonqa templo jatarichiyta qallariran, chaypaqmi allin kaq qorita, qolqeta, maderata, rumikunatapas utilizaran. Askha runakunan llank’aranku, jinan templota qanchis watapi ruwayta tukuranku. Templota inauguranankupaqmi Jehová Diosman sacrificiota jaywaranku. Salomontaq qonqorikuspa mañakuran: “Jehová Diosniy, qanqa aswan jatun aswan sumaq templotan merecenki. Chaywanpas, kaypi adorasqaykuta chaskiykuwayku”, nispa. ¿Kusikuranchu Dios templota ruwasqankumanta? ¿Uyariranchu Salomonpa mañakusqanta? Salomón mañakuyta tukuqtinmi cielomanta nina urayamuspa altarpi kaq llapa ofrendata rupharan. Chaywanmi Diosqa rikuchisharan templo ruwasqankumanta kusikusqanta. Chayta rikuspan Israel runakunapas kusikuranku.

Salomonqa yachayniyoq kasqanraykun lliu nacionpi allin reqsisqa karan. Runakunan payman riqku ima problemankupipas yanapananpaq. Sabá llaqtamanta reinapas sasa tapuykunata ruwananpaqmi riran. Salomón llapa tapuyninta kutichiqtinmi reynaqa niran: “Qanmanta willawasqankutaqa manan creeranichu, kunanqa yachanin ancha yachayniyoq kasqaykita. Diosniykin bendecisunki”, nispa. Runakunaqa kusisqan tiyaranku. Ichaqa pisi tiempomantan chhayna kausayqa tukupuran.