Israel llactata Salomón rey shina mandai callarijpica Jehová Diosca cashnami tapurca: ¿Imatata cuchun munangui? nishpa. Chaimi Salomonga cashna nirca: “Ñucaca, chairalla viñai huambrami cani. Imagutapash nara yachapanichu”. ‘Can agllashca gentecunata mandangapaj ali yuyaita carahuai’ nishpa. Jehová Diosca cashnami tigrachirca: ‘Can mañashcashnami ali yuyaita canman cusha. Chashna alipacha yuyaita charij runaca na tiangachu. Shinallata charij tucunatapashmi cusha’. ‘Ñucata na saquijpica canba causana punllacunatapash mirachishami’ nishpa.

Salomonga Jehovapa templo huasita shayachingapaca orota, culquita, ali caspicunata, ashtahuan ali rumicunatami utilizarca. Imacunatapash ruraita ali yachajushca ashtaca ashtaca jaricuna, huarmicunami 7 huatacunapi chai templo huasitaca rurai tucuchirca. Jipamanga chai templo huasi Jehovapa cashcata ricuchingapami altar jahuapi sacrificiocunata churashpa, Salomonga altar ñaupajpi cungurishpa cashna mañajurca: Jehová Dioslla canmanga cai huasitapash yali jatunda rurashpami ali caiman carcani. ‘Shina cajpipash ñucata Mandaj Taita Dioslla. Canda sirvij ñuca caparishpa mañajujtaca ricuhuangui. Canda sirvij, canba ñaupajpi caparishpa mañajujta uyashpa ricupangui’ nishpa. ¿Imatata yuyangui? ¿Chai templo huasitaca Jehová Diosca alicachircacha? ¿Salomón mañashcataca Jehová Diosca uyarcacha? Jehová Diosta ‘mañashpa Salomón tucuchijhuanmi, jahua pachamanda nina urai shamushpa Diosman cushca tucuilla rupachinatapash, animalcunapa aichatapash, tucuillata rupachirca’. Shinami Jehová Diosca chai templo huasita alicachishcata ricuchirca. Israelitacuna chaita ricushpaca ninandami cushijunajurca.

Rey Salomón alipacha yachaita charishcataca Israelmanda tucui llactacunapi, shuj caru llactacunapipashmi ninan rijsishca carca. Chaimi gentecunaca imapash problemacunapi ayudachun nishpa rey Salomonbaman rinajurca. Seba shuti llactata mandaj reinapashmi Salomón ciertopacha ali yachaita charishcata ricungapaj rirca. Chaimi chai reinaca ‘na tigrachi ushanalla tapuicunata’ rurarca. Shinapash Salomón chai tapuicunata ali contestajpica chai reinaca cashnami nirca: ‘Ñuca caiman nara shamushpaca, na crijurcanichu. Ñuca ñavihuambacha cunan ricujpicarin, chaupitallapash na parlahuashcachu. Can alipacha yachajushca cajtaca, ashtahuan yalitami ricujuni’. Canba Dios Jehovami candaca bendiciashca nishpa. Israelpi gentecunaca aliguta, cushillami causanajurca. Shinapash chai causaica ñallami tucurigrijurca.