Ked o Solomon ulo kralj ko Izrael, o Jehova pučlja lje: „So mangeja te dav tut?“ O Solomon phendža: „Me hijum terno hem na džanava so te čerav. Molinava tut, te de man mudrost te šaj šukar te vodinav te narodo.“ O Jehova phendža: „Odoljese so rodindžan mudrost, ka ove najmudro manuš ki celo phuv. Isto adžahar, ka ove but barvalo. Hem ako hijan maje poslušno ka živine but berša.“

O Solomon počmindža te čerel o hram. Ov koristindža o najšužo zlato, srebro, kaš hem bar. But iskusna murša hem džuvlja čerdže buti ko hram. Palo efta berš, o hram hine završimo hem spremno te posvetini pe e Jehovase. Odothe hine oltari kuri hine o žrtve. O Solomon bešlja ko kočija anglo oltari hem molindža pe: „Jehova, akava hram nane tuče dovoljno baro ja dovoljno šužo, ama molinava tut prihvatin amare žrtve hem šun amare molitve.“ Da li e Jehovase sviđindža pe o hram hem e Solomonesi molitva? Ked o Solomon završindža i molitva, o Jehova mukhlja jag kotar nebo hem thardža o žrtve ko oltari. Odoljeja o Jehova mothovdža so prihvatini o hram so čerdže. Ked o Izraelcija dikhlje odova, but radujindže pe.

O kralj Solomon hine pendžardo sar but mudro manuš ko celo Izrael hem ko but avera thana. O manuša alje ko Solomon te šaj te pomožini ljen te rešinen peklje problemija. Čak, i kraljica andi Sava alji koro ljeste hem pučlja lje phare pučiba te šaj te dikhel da li tano čače odova so vačerena oljestar. Ked šundža oljese odgovorija, oj phendža: „Me na verujindžum ko odova so vačerdže o manuša tutar, ama akana dikhava so hijan pana pomudro. To Devel, o Jehova, nagradindža tut.“ O manuša ko Izrael živindže but šukar hem hine bahtalje. Ama, o buča menindže pe.