После кода, сар о Соломоно ашэля царёса андо Израилё, о Иегова пушля лэстар: «Ԥэн, со тути тэ дав?» О Соломоно ԥэндя: «Мэ фартэ тэрно, мэ бут со на ӷанав. Мангав тут, дэ манди годи, кай тэ диқав пала тиро народо». О Иегова ԥэндя: «Драго, кай ту када манглян мандар. Мэ стерава, кай ту тэ авэс само годявэрно мануш пэ ԥув. Инке дава тути баро барвалимос. Кандэса ман, жувэса бут бэрша».

О Соломоно ля тэ терэл о храмо важ о Иегова. Во ля вся, со сас май лашо, када сомнак, руп, каш и кучутнэ бара. О храмо терэнас фартэ бут мурша и манушня, савэ драго ӷанэнас тэ терэн кадэя бути. Прожыля семь бэрш и о храмо дотердэ. Поджыля время, кай тэ отдэн о храмо лэ Иеговасти. О Соломоно терделя пэ чанга англа жертвеннико и мангляпэ: «Иегова, кадэва храмо важ тутэ най кацаво баро и най кацаво шукарно. Но, мангас тут, прилэ лэс и ашун амари молитва». Чалеля лэ Иеговасти о храмо и молитва? Сар кати о Соломоно домангляпэ, па нэбо сжыля яг и сԥабардя и жертвы, савэ слинэ по жертвеннико. Кадя о Иегова сыкадя, кай лэсти чалеля о храмо. Израильтяноря диқлэ, со стердя о Иегова, и линэ тэ радосавэн.

Пала лэ Соломоности годи ӷанэнас всаворэ и ко андо Израилё, и ко пала Израилё. И мануша авэнас лэстэ, кай во тэ поможый лэнди. Авеля даже и царица анда ԥув Савы. Вой камля тэ диқэл, исин со тэ ԥэнэн лэ Соломоности пэ латирэ ԥарэ алава. Кала вой ашундя лэсти дума, вой ԥэндя: «Мэ на патявас кодэлэсти, со ԥэнэнас пала тутэ. Но акана мэ диқав, кай ту инке май годявэрно, чем пала тутэ росԥэнэн! Дицол, кай кадэя годи дя тути тиро Дэл о Иегова». Кала о Соломоно диқэлас пала народо, и мануша жувэнас фартэ драго. Но прожыля время и вся паруделяпэ.