Mudamala Salomoni kuikhwa ninga mambo wa Aisraeli, Yahova abvundza: ‘Usafuna ndikupasenji?’ Salomoni atawira: ‘Ndine m’phale, ine nkhabe dziwa ndinatonga tani. Ndaphata miyendo, ndipaseni udziwisi toera nditsalakane mwadidi mbumba yanu.’ Yahova alonga: ‘Nakuti waphemba kukhala waudziwisi, ine ndinadzacita toera ukhale mamuna waluso kakamwe pa dziko yapantsi. Ndinakupasambo mpfuma. Ungandibvera, unakhala pyaka pizinji.’

Salomoni atoma kumanga templo. Iye aphatisira, ouro, parata, matabwa na miyala. Amuna na akazi azinji akuti akhadziwa basa ya kumanga, aphedza kumangwa kwa templo. Pakupita pyaka pinomwe, templo yamala kumangwa toera kuperekwa kwa Yahova. Templo ineyi ikhali na guwa toera kupereka ntsembe. Salomoni agodama kutsogolo kwa guwa mbaphemba: ‘Yahova, templo iyi ndi ing’ono, pontho nee ndi yakubalika kakamwe kuna imwe, mbwenye ndaphata miyendo tawirani ulambiri wathu na bveserani maphembero athu.’ Kodi Yahova aona tani templo na phembero idacita Salomoni? Mudamala Salomoni kucita phembero, wabwera moto kubuluka kudzulu mbupisa ntsembe zikhali pa guwa. Natenepa, templo yakhala yakutawirika kwa Yahova. Aisraeli pidaona iwo pyenepi akomerwa.

Mambo Salomoni akhali na mbiri thangwi ya udziwisi wace. Anthu a mbuto zizinji akhaenda kuna iye toera kuphedzwa kumalisa nyatwa zawo. Ngakhale nyanyi wa ku Sabha aenda kuna Salomoni mbacita mibvundzo yakunentsa. Mudamala nyanyi wa ku Sabha kubva matawiro a Salomoni, iye alonga: ‘Mudapibva ine nee ndapitawira. Ndabwera kuno kudzapiona na maso anga, mbwenye cincino ndaona kuti imwe muna udziwisi kakamwe. Yahova Mulungu wanu asakupasani nkhombo.’ Mbumba ya Israeli ikhali yakutsandzaya. Mbwenye pinthu pyadzacinja.