Selemooni Israeelete moote ikki gedensaanni Yihowa iso, “Maa aammohera hasiˈratto?” yee xaˈmisi. Selemooni togo yee qoli: ‘Ani qaaqqoho. Gashshinanni garano diegennoommo. Ballo mannakki danchu garinni gashsheemmo gede egenno uyie.’ Yihowa togo yiisi: ‘Egenno huucciˈrootto daafira, uullate aana noo manninni roore egennaamo asseemmohe. Qoleno dureessa ikkatto. Anera hajajamittoro seeda diro heeˈratto.’

Selemooni qullaawa mine mina hanafi. Isi qullaawa mine culkunni, camotenni, haqqetenninna kinnatenni minino. Lowo kume ikkannohu ogeeyye labballinna meenti qullaawa mine mina kaaˈlino. Gedensaanni qullaawa mine minne gunde maassinsara kaˈni. Qullaawu mini giddo kakkallanni dargi no; hakko dargi aana kakkalo worroonni. Selemooni kakkallanni dargira albaanni guluphe togo yee huuccatto assino: ‘Yihowa, kuni qullaawu mini ate dihaarannohe; ikkirono eeggatena kakkalonke adhi; huuccattonkeno macciishshi.’ Qullaawu mininna Selemooni assino huuccatto Yihowa hagiirsiissino? Selemooni huuccatto asse kaˈˈanni heeˈreenna, iiminni giira dirrite kakkallanni dargira noo kakkalo mucuqqi assite ittu. Konni garinni Yihowa qullaawa mine baxinota leellishino. Israeelete manni tenne laiti lowo geeshsha hagiidhino.

Moote Selemooni egennaamo ikkinota Israeelete manninna xeertote heeˈranno manni afino. Mannu qarrisinonsare Selemoonira kuˈlanno. Saaba mootitte nafa qarrissanno xaˈmonni fonqoltasira isiwa martino. Ise Selemooni qolino dawaro macciishshite togo yitino: ‘Gobbaˈyara heeˈreenna mannu ate daafira kulinoere diammanoomma; egennokki gobbaˈyara heeˈreenna kulloonnieta roortannote; Maganikki Yihowa maassiˈrinohe.’ Hatte yannara Israeelete daga dancha heeshsho heedhino; hattono hagiirraamma ikkitino. Kayinni insa hatte gedeenni diheedhino.