Solomon yange hingir tor u Iserael yô, Yehova pine un ér: ‘U soo wer m na u nyi?’ Solomon kaa ér: ‘M ngu wanye, m fa er me hemen ior ga. Yô nam kwaghfan sha er me nenge sha ior ou tsembelee yô.’ Yehova kaa a na ér: ‘Er u Sônom kwaghfan yô, me na u kwaghfan a hemba hanma or sha tar cii. Shi me na u inyaregh kpishi. Shi aluer u ngu ungwan imo yam yô, u tsa kpishi.’

Tsô Solomon hii u maan tempel. Yange maa tempel la sha zenaria u dedoo man azurfa man ikyon kua awen a injaa. Lu nomso man kasev mba fan tomaveegh er tom u maan tempel la ye. Yange i maa tempel la anyom ataankarahar, mba been yô, gba u a tsegha un sha ci u Yehova. Tempel la lu a atse a nanden naagh ker, nahan i ver iniav mbi nanden sha mi. Tor Solomon maa gure hen atse a nanden naagh la, er msen kaa ér: ‘Yehova, tempel ne kehe shin a engem kuma sha a we ga, kpa wea lumun yô, ungwa mbamsen asev shi lumun mcivir wase.’ Yehova yange nenge tempel la kua msen u Solomon er la nena? Solomon eren msen been yô, fese je maa usu sen sha va hia iniav mbi i ver sha atse a nanden naagh la, sha u tesen je ér Yehova lumun tempel la. Mbaiserael mba nengen nahan yô, ve ember tsung.

Kwaghfan u Tor Solomon la yange na yô, ior fa kwagh na ken tar u Iserael cii, kua ken ityar i icaa je kpaa. Ior yange ve vaan hen Solomon ér a wase ve u sôron mbamzeyol vev. Torkwase u ken tar u Sheba je kpa yange va hen a na va pine un mbampin mba taver sha u karen un. Yange ungwan mbamlumun mba Solomon na un la cii yô, a kaa ér: ‘Yange i ôrom kwagh wou, kpa m na jighjigh ga. Hegen yô, m va nenge iyol yam. U ngu a kwaghfan je hemba er yange i ôrom la. Yehova, Aôndo wou na u iveren kpishi.’ Yange mkpeyol lu ken Iserael hen shighe ne kpishi, nahan saan Mbaiserael iyol. Kpa lu u kwagh a va gema.