Solomoni naakaba mwaamwi wamaIsrayeli, Jehova wakamubuzya kuti: ‘Uyanda kuti ndikupeenzi?’ Solomoni wakati: ‘Ndichili muniini alimwi tandizizi nzindeelede kuchita. Ndikumbila kuti undipe busongo bwakuti ndikonzye kweendelezya bantu bako.’ Jehova wakati: ‘Akaambo kakuti wakumbila busongo, ndiyookupa busongo bwiingi kwiinda bantu boonse bali anyika. Alimwi uyooba abunoti bwiingi. Ikuti watobelezya milawu yangu, uyoopona minyaka myiingi.’

Solomoni wakatalisya kuyaka tempele. Wakabelesya ngolida, nsiliva, zisamu amabwe. Alubo wakabelesya baalumi abanakazi biingi bakali aluzibo. Nikwakiinda minyaka iili 7, tempele lyakamana kuyakwa alimwi lyakapedwa kuli Jehova. Lyakali achipayililo alimwi ajulu achipayililo kwakali zituuzyo. Solomoni wakafugama kunembo lyachipayililo akukomba kuti: ‘O Jehova tempele eeli talili pati loko alimwi talili bbotu loko, nkinkaako, tukumbila kuti utuzumizye tukukombe akuti uswiilile nkombyo zyesu.’ Jehova wakamvwa biyeni atala atempele ankombyo yaSolomoni? Mbaakamaninsya biyo kukomba Solomoni, kujulu kwakazwa mulilo wakawumpa zituuzyo zyakali achipayililo. Jehova wakalitambula tempele. MaIsrayeli bakabotelwa.

Busongo bwaMwaami Solomoni bwakazibwa abantu boonse bamuchisi chaIsrayeli abakali kukkala kule. Bantu bakali kuswaana mapenzi bakali kuza kuli Solomoni kuzoogwasigwa. Mwaami mukayintu wakuShebba, wakasika kuti azoosunke Solomoni amibuzyo miyumu. Naakamvwa nsandulo zyaSolomoni, wakati: ‘Teendakasyoma nzindakamvwa atala anduwe, pesi lino ndabona kuti ulimusongo kwiinda mbubakali kukwaamba. Jehova Leza wako wakakulongezya.’ MaIsrayeli bakakkede kabotu alimwi bakali kubotelwa. Pesi zintu zyakali kuyoochincha.