Sulemani obuyafokere mukama wa Isareri, Yahwe akamukaguza ati: ‘Wakugondeze nkuhe ki?’ Sulemani yamugarukamu ati: ‘Nyowe nkyali muto, kandi tindukumanya kiki eky’okukora. Ninkusaba ompe amagezi ag’okurolerra abantu bawe.’ Yahwe yamugambira ati: ‘Habwokuba osabire amagezi, ninyija kukufoora muntu arukukirrayo kimu amagezi. Ninyija n’okukufora muguuda. Kandi obw’oranyorobera, noija kwomeera emyaka nyingi.’

Sulemani akatandika kwombeka yekaru. Akakozesa ezabu erukukirrayo kimu oburungi, efeza, embaaho, hamu n’amabale. Enkumi n’enkumi z’abasaija n’abakazi abakaba bali bakugu bakakora omulimo gw’okwombeka yekaru. Hanyuma y’emyaka musanju, yekaru ekaba ehikire kuhebwayo hali Yahwe. Yekaru enu ekaba ine ekyoto kandi bakiherahoga ebihongwa. Sulemani akateeza amaju omu maiso g’ekyoto yasaba nagamba ati: ‘Ai Yahwe, yekaru enu teri nkooto kandi tesemiire muno kuhika ha kitinisa kyawe, baitu nitukwesengereza oikirize okuramya kwaitu kandi ohurre okusaba kwaitu.’ Yahwe akaikiriza yekaru n’okusaba kwa Sulemani? Sulemani obuyamazire kusaba, aho n’aho, omurro gukaruga haiguru gwayokya ekihongwa ekikaba kiri ha kyoto. Yahwe akaikiriza yekaru. Kandi Abaisareri obu barozere kinu, bakasemererwa muno.

Omukama Sulemani akaba amanyirwe omu Isareri yona n’omu bicweka ebya hara habw’amagezi ge amaingi. Abantu baijaga kumwehanuzaho nukwo abakonyere ebizibu byabo. Omugo wa Seba nauwe akaija kumulengesa n’ebikaguzo ebigumire. Obuyahuliire omulingo yabigarukiremu, akagamba ati: ‘ntaikirize eby’abantu bangambiire ebirukukwata ha magezi gawe baitu hati nyeroliire ngu oine amagezi maingi kukira nk’oku nahuliire. Ruhanga wawe, Yahwe akuhaire omugisa.’ Ensi ya Isareri ekaba etekaine kandi n’abantu bakaba baine okusemererwa. Baitu ebintu bikaba biri haihi kuhinduka.