I muri aˈe i to Solomona riroraa ei arii no Iseraela, ua ani Iehova ia ˈna: ‘Eaha ta oe e hinaaro ra ia horoa ˈtu vau?’ Ua pahono Solomona: ‘Mea apî roa vau e eita vau e ite eaha te rave. A horoa mai na i te paari ia haapao maitai au i to oe nunaa.’ Ua na ô atura Iehova: ‘Ua ani mai oe ia î oe i te paari. E faariro ïa vau ia oe ei taata î roa ˈˈe i te paari i nia i te fenua nei. E faariro atoa vau ia oe ei taata taoˈa rahi. Ia faaroo oe ia ˈu, e ora maoro oe.’

Ua haamata Solomona i te patu i te hiero. Ua faaohipa oia i te auro maitai roa ˈˈe, te ario, te raau e te ofai. Ua ohipa e tausani tane e vahine aravihi i roto i te paturaa o te hiero. Hitu matahiti i muri iho, ua oti te hiero e e nehenehe te reira e pûpûhia na Iehova. Te vai ra te hoê fata e e tusia i nia i te reira. Ua tuturi o Solomona i mua i te fata e ua pure oia: ‘E Iehova e, aita te rahi e te nehenehe o tera hiero e navai no te faahanahana ia oe. Tera râ, a farii na i ta matou haamoriraa e a faaroo i ta matou pure.’ Eaha ta Iehova i manaˈo no nia i te hiero e ta Solomona pure? I te taime iho â i oti ai Solomona i ta ˈna pure, ua faatopa Iehova i te hoê auahi mai te raˈi mai e ua ama mai te mau tusia i nia i te fata. A na reira ˈi, ua faaite Iehova e ua farii oia i te hiero. A ite ai to Iseraela i te reira, ua oaoa roa ratou.

Ua matauhia te arii Solomona no to ˈna paari i Iseraela e i te mau vahi atea atoa. Ua haere mai te mau nunaa e farerei ia Solomona no te ani i te tauturu no to ratou mau fifi. Ua haere atoa mai te arii vahine no Seba no te tamata i to ˈna paari ma te tuu atu i te mau uiraa fifi mau. A faaroo ai oia i ta Solomona mau pahonoraa, ua parau te arii vahine: ‘Aita vau i tiaturi i ta te mau taata i parau mai no nia ia oe. I teie nei râ, te ite nei au e mea rahi aˈe to oe paari i ta te taata i faatia mai. Ua haamaitai to oe Atua ra o Iehova ia oe.’ Mea maitai roa te oraraa i Iseraela e mea oaoa roa te nunaa. E itehia râ te tahi mau tauiraa.