Соломон Израильдиң хааны апарган соонда, Иегова оон айтырган: «Сеңээ белек кылдыр чүнү берейн?» Соломон: «Мен ам-даа аныяк болгаш, хөй чүүлдү чедир билбес-тир мен. Эки хаан болур кылдыр, меңээ мерген угаандан берип көрем» — деп харыылаан. Иегова аңаа мынча дээн: «Мерген угаанны дилээниң дээш, сени чер кырынга эң мерген угаанныг кижи кылып каар мен. Оон ыңай дыка бай боор сен. Меңээ дыңнангыр боор болзуңза, узун назылаар сен».

Соломон Иегованың өргээзин тудуп эгелээн. Ол эң эки шынарлыг алдын-мөңгүннү, ыяшты болгаш үнелиг даштарны ажыглап турган. Өргээниң тудуунга муң-муң эр-херээжен улус киржип турган. Чеди чыл эрткенде, тудуг дооступ каарга, ону Иеговага бараалгадыр үе келген. Соломон өргүл салыр бедигээштиң мурнунга дискектенип олуруп алгаш, Бурганга мөргээн: «Иегова, бо өргээ ындыг кончуг бедик, чараш эвес-даа бол, бистиң белээвисти хүлээп, мөргүлдеривисти дыңнап көр». Өргээ болгаш Соломоннуң мөргүлү Иегованың сеткилинге кирген бе? Соломон мөргүптери билек, дээрден от бадып келгеш, өргүл салыр бедигээшке өргүлдү өрттедипкен. Ынчаар Иегова өргээге таарзынганын көргүскен. Ону көргеш, израильчилер аажок өөрээн.

Соломоннуң мерген угааны бүгү Израильге болгаш өске-даа черлерге билдингир апарган. Улус оон дуза дилеп кээр турган. Шеваның кадыны Соломон берге айтырыгларга харыылап шыдаар бе дээш чедип келген. Ооң харыыларын дыңнааш, ол кадын: «Улустуң сээң дугайыңда чугаалап турган чүүлүнге бүзүревейн турдум. А сен оларның чугаалап турарындан-даа артык мерген угаанныг-дыр сен! Иегова Бурганың сени йөрээген-дир» — дээн. Соломоннуң үезинде улус эки чурттап чораан. Ынчалза-даа шупту чүве өскерли берген.