Ka káaj u gobernar Salomón tu luʼumil Israeleʼ, Jéeobaeʼ tu yaʼalajtiʼ: ‹Kʼáatten jeʼel baʼalak a kʼáat ka in tsʼáatecheʼ›. Salomón túuneʼ tu yaʼalajtiʼ: ‹Teneʼ chéen juntúul táankelem paalen yéetel yaʼab baʼaloʼob maʼ in wojliʼ. Beet uts a tsʼáaikten naʼatil utiaʼal in kanáantik a kaajal›. Jéeobaeʼ tu yaʼalajtiʼ: ‹Yaan in tsʼáaiktech naʼatil jeʼex tsʼoʼok a kʼáatiktenoʼ. Tiʼ mix máak kun antal junpʼéel naʼat jeʼex le kun antaltechoʼ. Yaan xan in tsʼáaiktech ayikʼaliloʼob yéetel yaan in beetik u xáantal a kuxtal wa ka wuʼuyik in tʼaan›.

Salomoneʼ tu káajsaj u beetik le templooʼ. Meyajnaj oro, plata, cheʼob yéetel jatsʼuts tuunichoʼob tiʼ. Áantajnaj u milesil xiiboʼob yéetel koʼoleloʼob jach yojel u beetoʼob jejeláas meyajoʼob. Le temploaʼ tsʼoʼoksaʼab ich siete años. Ka kʼuch u kʼiinil u kʼuʼubul tiʼ Jéeobaeʼ, tsʼaʼab kíimsbil baʼalcheʼob teʼ altaroʼ. Salomón túuneʼ xolaj aktáan tiʼ le altaroʼ ka orarnaji: ‹Jéeoba, techeʼ ka náajmatik junpʼéel templo maas nojoch yéetel maas jatsʼuts tiʼ lelaʼ. Chéen baʼaleʼ kʼam le adoración k-tsʼáaiktechoʼ bey xan k-oracionoʼob›. A tuklikeʼ, ¿tu kʼamaj wa Jéeoba le templooʼ? ¿Tu yuʼubaj wa u oración Salomón? Ka tsʼoʼok u orar Salomoneʼ, éem kʼáakʼ teʼ kaʼanoʼ ka tu tóokaj le kíimsbil baʼalcheʼoboʼ. Bey úuchik u yeʼesik Jéeoba tu kʼamaj le templooʼ. Ka tu yilaj le israelitaʼob leloʼ, jach kiʼimakchaj u yóoloʼob.

Yoʼolal le yaʼabkach naʼat anchaj tiʼ Salomonoʼ, kʼaj óoltaʼab tiʼ tuláakal u luʼumil Israel bey xan tiʼ náanach kaajoʼob. Le máakoʼoboʼ ku binoʼob kaʼach u yiloʼob utiaʼal ka áantaʼakoʼob u yutskíint u problemaʼoboʼ. Tak u reinail Sebaeʼ utiaʼal u yilik wa jach jaaj yaan u naʼateʼ bin u yil utiaʼal u beetik kʼáatchiʼob tiʼ jach talamtak. Ka tu yuʼubaj bix núukaʼabik tiʼ tumen Salomoneʼ, tu yaʼalaj: ‹Maʼ tin creertik kaʼach le baʼax tsikbaltaʼabten ta woʼolaloʼ, chéen baʼaleʼ beoraaʼ kin wilkeʼ maas yaan a naʼat tiʼ le aʼalaʼabtenoʼ. Jéeoba, a Dioseʼ, jach tsʼoʼok u bendecirtikech›. Tu luʼumil Israeleʼ jach jatsʼuts u kuxtal kaʼach le máakoʼoboʼ yéetel kiʼimak u yóoloʼob. Chéen baʼaleʼ yaan kaʼach u kʼexpajal tuláakal.