Dxi bizulú biʼniʼ mandar Salomón guidxi Israel, gunabadiidxaʼ Jiobá laabe: «¿Xi racaláʼdxiluʼ gudieeʼ lii?». Salomón bicabi: «Nahuiineruaʼ ne huaxieʼruʼ nannaʼ. Nga runi, rinabaʼ lii gudiiluʼ naa guendabiaaniʼ para gapaʼ xquídxiluʼ». Gudxi Jiobá laabe: «Cumu gunábaluʼ naa guendabiaaniʼ la? zuneʼ lii hombre jma nuu xpiaaniʼ lu Guidxilayú. Laaca zuneʼ lii ricu, ne zabániluʼ stale iza pa guzuubaluʼ stiidxaʼ».

Bizulú bicuí Salomón templu que. Biquiiñebe oro, plata, yaga ne guié. De ni jma galán ca material que. Stale mil hombre ne gunaa ni nanna guni dxiiñaʼ gucanecaʼ para gurí templu que. Biaʼsi gadxe iza bindaa para biluxe gurí templu que. Ne bedandá dxi gaca dedicar ni, gudíxhecabe ofrenda lu altar que. Bizuxibi Salomón nezalú altar que ne biʼniʼ orar: «Jiobá, lii naquiiñeʼ guicaaluʼ ti templu jma naroʼbaʼ ne jma sicarú que ndiʼ. Peru, rinabaʼ lii guicaaluʼ adoración stidu ne gucaadiágaluʼ ca oración ni gúnidu». ¿Lii xi rábiluʼ? ¿Ñee guyuulaʼdxiʼ Jiobá templu que la? ¿Ñee bicaadiágabe oración stiʼ Salomón la? Biluxe biʼniʼ orar si Salomón, biaba gui de guibáʼ ne bizaaqui ni ca ofrenda que. Zaqué bisihuinni Jiobá guyuulaʼdxiʼ templu que. Ora biʼyaʼ ca israelita ni guca que, guizáʼ biéchecaʼ.

Guidubi guidxi Israel ne dede ca lugar jma zitu binibiáʼcabe rey Salomón purtiʼ guizáʼ nuu xpiaaniʼ. Guyé stale binni ra nuube para gacanebe laacaʼ gacachaahuiʼ ca guendanagana sticaʼ. Dede reina de Seba guyé ra nuube para guʼyaʼ pabiáʼ nuu xpiaanibe, ne gunabadiidxaʼ laabe stale cosa nagana. Ora binadiaga reina riʼ modo bicabi Salomón laa, guníʼ: «Gúdxicabe naa nuu xpiaaniluʼ, peru qué ñuneʼ cré ni, peru yanna huaxa maʼ biiyaʼ dxandíʼ guizáʼ nuu xpiaaniluʼ. Jiobá, Dios stiluʼ, maʼ guluu ndaayaʼ lii». Guizáʼ galán ne nayecheʼ bibani ca binni de Israel. Peru qué zandaa zuchaa modo nabánicabe.