I kare ma Solomon pud omedde ki woro Jehovah, kuc obedo tye i lobo Icrael. Ento Solomon onyomo mon mapol ma gia ki i rok mapatpat, dok mon magi onongo giworo cal apaya. Motmot, Solomon olokke woko, ci en bene ocako woro cal apaya. Kiniga omako Jehovah matek. En owaco bot Solomon ni: ‘Abikwanyo ker me Icrael woko ki boti ci apoko iye aryo. Abimiyo but ker maditte bot laticci, ci jo me otti gibiloyo bute matidine keken.’

Jehovah oweko man ongene ka maleng dok i yo mukene. Latic pa Solomon acel ma nyinge Jeroboam, onongo tye ka wot i yo ci orwatte ki lanebi ma nyinge Akija. Akija oyeco bongone i dul 12 ci owaco bot Jeroboam ni: ‘Jehovah bimayo ker me Icrael woko ki i cing Solomon ci poko iye i dul aryo. Kwany dul bongo apar pien ibibedo kabaka ma loyo wi kaka apar.’ Kabaka Solomon owinyo lok man ci otemo neko Jeroboam! Pi man, Jeroboam oringo woko i Ejipt. I nge kare mo, Solomon oto woko ci wode Rekoboam odoko kabaka. Jeroboam dong onongo ni gin mo marac pe, etwero dok cen i Icrael.

 Ludongo muteggi me Icrael guwaco bot Rekoboam ni: ‘Ka itero lwak maber, gin gibibedo lugen boti.’ Ento awobe ma lurem Rekoboam guwacce ni: ‘Myero ibed mager i kom lwak! Med yec ki tic matek i wigi!’ Rekoboam olubo tam pa awobe luwote. En odoko ger adada i kom lwak, ci lwak gujemo i kome. Guketo Jeroboam me bedo kabaka me kaka apar, ma kilwongo ni ker me Icrael. Kaka aryo mudong-ngi kilwongo ni ker me Juda, dok gubedo lugen bot Rekoboam. Kaka 12 me Icrael onongo dong opokke woko.

Jeroboam onongo pe mito ni jone gucit ka woro Lubanga i Jerucalem, ma onongo tye i te loc pa Rekoboam. In ingeyo pingo? Jeroboam onongo tye ki lworo ni cwiny lwak bidok woko i kom Rekoboam ci gikwere woko. Pi meno, en oyubo litino twoni aryo me jabu ci owaco bot jone ni: ‘Jerucalem tye ka mabor tutwal. Wuromo woro Lubanga dong ki kany.’ Lwak gucako woro cal litino twoni me jabu aryo-ni ci wigi owil i kom Jehovah doki.