Salomonajj Jehová Diosar adorkäna ukhajj Israel markan suma jakasiñaw utjäna. Ukampis Salomonajj idolonakar adoriri yaqha markankiri walja warminakampiw casarasïna. Jukʼat jukʼatjja Salomonajj janiw pachpäjjänti, idolonakaruw adorjjarakïna. Jehová Diosajj wal colerasïna, sarakïnwa: ‘Janiw familiamajj Israel markar apnaqjjaniti, payaruw reino jaljtayäjja. Jachʼäkani ukjja mä servirimaruw churäjja, jiskʼäkani ukakwa familiamajj apnaqjjani’ sasa.

Kuntï Diosajj siskäna uk jukʼamp qhanañchäna. Salomonan Jeroboán sat mä serviripajj viajenkaskänwa, ukatwa Ahíya sat profetampejj thakin jikisipjjäna. Uka profetajj tunka payaniruw mä isip chʼiyjäna, ukatsti Jeroboanar akham sänwa: ‘Jehová Diosajj Salomonan familiapat reino apaqasajj payaruw jaljtayani. 10 chʼiyaqat telanakjja jum apasim, jumaw 10 tribunak apnaqjjäta’ sasa. Salomonajj uk yatïna ukhajja Jeroboanar jiwayañwa munäna. Ukatwa Jeroboanajj Egiptor escapjjäna. Tiempompejja Salomonajj jiwjjänwa, Rehoboam yoqapaw Israel mark apnaqjjarakïna. Jeroboanajj Salomonan jiwjjatap yatisajj Israel markaruw kuttʼanjjäna.

 Qhepatjja, Israel markan jilïr irpirinakapajj Rehoboam reyir akham sapjjänwa: ‘Aka markar sum uñjätajja, janiw jumat jitheqtapkaniti’ sasa. Wayna masinakapajj akham sapjjarakïnwa: ‘Aka markar tʼaqesiyañamawa. Jukʼamp trabajonak churam’ sasa. Rehoboamajj masinakapar istʼasaw markar tʼaqesiyäna, ukatwa jupa contra saytʼapjjäna, Jeroboanaruw 10 tribunak apnaqañapatak uttʼayapjjarakïna. 10 tribunakajj reino de Israel sasin uñtʼatäjjänwa. Jiltʼkäna uka pä tribusti reino de Judá sasin uñtʼatäjjarakïnwa, jupanakajj janiw Rehoboamat jitheqtapkänti. Ukhamaw Israelan 12 tribunakapajj payar jaljtäna.

Jerusalén markjja Rehoboam reyiw apnaqäna. Jeroboán reyisti janiw uka markar Diosar adoriri sarapjjañap munkänti. ¿Kunatsa? ‘Jaqenakajj nayat jitheqjjasajj Rehoboamaruw kuttʼjjapjjaspa’ sasaw ajjsaräna. Ukatwa pä vaca qallu qorit luräna, markar akham sarakïnwa: ‘Jerusalén markajj wali jayankiwa. Aka markanaki aka vaca qallunakar adorapjjam’ sasa. Jaqenakajj uka vaca qallunakaruw adorjjapjjäna, wasitatwa Jehová Diosat armasjjapjjäna.