Mu ngéda yosôna Salômô a ba bégés Yéhôva, nsañ u bé i loñ Israel. Ndi i mbus, Salômô a biiba ni bôda ba biloñ bipe, ba ba bé babégés bisat. Ndék ni ndék, Salômô a héñha, a bôdôl bégés bisat. Yéhôva a unup. A kal Salômô le: ‘Israel a ga kadlana i moo ma lihaa joñ, a kéba ki ngélé iba. Me ga ti ngwélél woñ wada pes keñi, ndi lihaa joñ li ga yégla ndik isii pes.’

Yéhôva a bi yis makidik mé ni njel ipe. Mu kiki a bé ke i njel, ngwélél Salômô wada le Yérôbôam a bi boma mpôdôl Ahiya. Ahiya a pat mbot yé bipes 12, a kal Yérôbôam le: ‘Yéhôva a ga kadal ane Israel i moo ma lihaa li Salômô, a kap yo môga ima. Yoñ jôm li bipes bi mbot inyule wen w’a ba kiñe i jôm li matén.’ Kiñe Salômô a nok bañ hala, a kahal yéñ manjel i nol Yérôbôam! Inyu hala nyen Yérôbôam a bi ke ngwéé i Égiptô. I mbus ngéda, Salômô a wo, man wé Rôbôam a yila kiñe. Jon Yérôbôam a bi kon ha bé woñi, a témb i Israel.

 Mimañ mi Israel mi kal Rôbôam le: ‘Ibale u ntééda bôt ba litén loñge, b’a téñbe ni we.’ Ndi bisega bi Rôbôam bi kal nye le: ‘Tét bôt ba litén! Sélés bo ni ngui iloo ha!’ Maéba ma bisega gwé mon Rôbôam a bi nok. A lédhene litén ñem, jon li bi kolba nye. Jôm li matén li téé Yérôbôam kiñe, mon ma bi yila ane Israel. Ndi matén ima ma bi téñbe ni Rôbôam; mo ma yila ane Yuda. Nano, 12 matén ma Israel ma yé nkabak.

Mu kiki Yérusalem a bé i pes i Rôbôam, Yérôbôam a bé gwés ha bé le bôt bé ba ke nyoo inyu bibégés. Baa u nyi inyuki? Inyule Yérôbôam a bé kon woñi le ba nhielbana nye, ba témb yak Rôbôam. Jon, a bi bañ bon ba nyaga ba gôl iba, a kal bôt bé le: ‘Yérusalem a yé haa. Béghana hana.’ Litén li bôdôl bégés bisat, li témb ki li hôya Yéhôva.