Saleleng manomba Jahowa si Salomo, dame do Israel. Alai, godang do istri ni si Salomo na so halak Israel. Angka panomba patung do nasida. Lam leleng, gabe dohot ma si Salomo manomba patung songon istrina. Muruk ma Jahowa, didok ma, ‘Dibagi dua nama Israel. Lehononku ma na umbalga tu pangurupimu. Jala na ummetmet tu pinomparmu.’

Masa ma na didok Jahowa i. Adong do pangurupi ni si Salomo na margoar si Jerobeam. Tingki di dalan, pajumpang ma ibana dohot panurirang Ahia. Diribak si Ahia ma bajuna gabe 12 bagian. Didok ma tu si Jerobeam, ‘Buaton ni Jahowa nama harajaon ni Israel sian keluarga ni si Salomo. Dibagi dua nama harajaon i. Buat ma sampulu di ho. Ai ho do na laho gabe raja di harajaon na sampulu marga.’ Diboto si Salomo ma i jala naeng dibunu ma si Jerobeam! Lari ma si Jerobeam tu Mesir. Alai dung mate si Salomo, mulak ma muse si Jerobeam tu Israel. Dung i, anak ni si Salomo na margoar si Rehabeam ma na gabe raja.

 Didok angka natua-tua ni Israel ma tu si Rehabeam, ‘Molo burju do ho tu bangso on, setia do nasida tu ho.’ Alai ro ma dongan satorbang ni si Rehabeam mandok, ‘Unang ma paburjuhu ho tu bangso on! Paksa ma nasida karejo!’ Diihuthon si Rehabeam do hata ni donganna i. Gabe kejam do ibana tu bangso i. Ujungna, mangalo ma na sampulu marga i tu ibana. Dibahen nasida ma si Jerobeam gabe raja ni nasida. Didok ma i harajaon ni Israel. Alai na dua marga nai setia do tu si Rehabeam. Digoari ma i harajaon ni Juda. Nunga tarbagi be na 12 marga i.

Ndang lomo roha ni si Jerobeam molo laho rayatna tu Jerusalem manomba Debata. Diboto ho do boasa songon i ibana? Alana, harajaon ni si Rehabeam do disi. Mabiar do si Jerobeam gabe marpihak rayatna tu si Rehabeam. Dibahen ibana ma dua patung lombu na sian mas. Didok ma tu rayatna, ‘Padaohu do hamu laho tu Jerusalem. Dison ma hamu manomba Debata.’ Gabe disomba nasida ma patung lombu i. Lupa ma nasida tu Jahowa.