I nun mɔ Salomɔn su Zoova’n, Izraɛlifuɛ mun be wun jɔli be fɔuun. Sanngɛ Salomɔn wa jali nvle uflɛ nun bla kpanngban mɔ be sɔ amuin’n. Blɛblɛblɛ Salomɔn yacili Zoova sulɛ, kpɛkun ɔ sɔli amuin wie. I sɔ’n ti’n, Zoova fali ya. Ɔ seli Salomɔn kɛ: ‘Ń má dé Izraɛli nvle’n wɔ awlobo’n i sa nun. Ń bú nun nɲɔn. Ɔ awlofuɛ mun bé wá síe i bue kaan kpafuɛ’n, kpɛkun ɔ sufuɛ mun be nun kun yɛ ɔ́ síe i bue danfuɛ’n niɔn.’

Zoova yili i sɔ liɛ’n i nglo weiin. Yɛle kɛ cɛn kun’n, Salomɔn i sufuɛ Zeroboamun su kɔ lika kun, kpɛkun ɔ nin Ɲanmiɛn nuan ijɔfuɛ Asiza be yiali. Asiza titili i bɔbɔ i tralɛ’n nun blu-nin-nɲɔn (12) yɛ ɔ seli Zeroboamun kɛ: ‘Zoova wá dé Izraɛli nvle’n Salomɔn i awlobo’n i sa nun, yɛ ɔ́ bú nun nɲɔn. Fa tralɛ’n i bue blu, afin á wá síe Izraɛli nvle’n i akpasua blu.’ Kɛ Famiɛn Salomɔn tili ndɛ sɔ’n, i waan ɔ́ kún Zeroboamun. I sɔ’n ti’n, ɔ wanndi ɔli Ezipti. Kɛ ɔ́ kɔ́ i ɲrun’n, Salomɔn wuli, yɛ i wa Rɔbɔamun yoli famiɛn. Zeroboamun wunnin kɛ ɔ kwla sɛ i sin Izraɛli lɔ siɛn’n.

 Izraɛli kpɛnngbɛn mun be seli Rɔbɔamun kɛ: ‘Sɛ a yo nvlefuɛ mun be cɛcɛ’n bé jrán ɔ sin.’ Sanngɛ i janvuɛ mun be seli i kɛ: ‘Ɔ fata kɛ a yo nvlefuɛ mun be tɛtɛ. Mian be naan be di junman kekle kpa!’ Rɔbɔamun fɛli i janvuɛ mun be afɔtuɛ liɛ’n su. Ɔ yoli nvlefuɛ mun be tɛtɛ, ɔ maan be mannin be wun su. Izraɛli akpasua blu be fali Zeroboamun kɛ ɔ yo be su famiɛn. Kɛ ɔ́ kɔ́ i ɲrun’n, be wa flɛli be akpasua liɛ’n kɛ Izraɛli. Akpasua nɲɔn be kali Rɔbɔamun sin. Be wa flɛli be akpasua liɛ’n kɛ Zida. Ɔ maan Izraɛli akpasua blu-nin-nɲɔn (12) mun be nun bubuli.

Zeroboamun kunndɛman kɛ i nvle’n nunfuɛ mun be wɔ Zerizalɛmun. ?A si sa ti’n? Rɔbɔamun yɛ ɔ sie lɔ lika’n niɔn. Ɔ maan ɔ bu i kɛ, sɛ be kɔ lɔ’n, bé jrán Rɔbɔamun sin, yɛ bé káci be sin sí i. I sɔ’n ti’n, ɔ yoli sika ɔkwlɛ nannin ba nɲɔn, yɛ ɔ seli nvlefuɛ mun kɛ: ‘Zerizalɛmun klɔ’n o mmua dan. Amun kwla su Ɲanmiɛn wa.’ Nvlefuɛ mun be yacili Zoova lɛ be sɔli sika ɔkwlɛ nannin ba sɔ mun.