Malinawon ang Israel dihang si Solomon nagsimba kang Jehova. Pero nangasawa si Solomon ug daghang babaye gikan sa ubang nasod nga tigsimbag mga idolo. Tungod niana, hinayhinay nga nausab si Solomon ug misimba na siyag mga idolo. Nasuko si Jehova. Iyang giingnan si Solomon: ‘Akong kuhaon gikan sa imong pamilya ang gingharian sa Israel ug bahinon kini. Ihatag nako sa imong sulugoon ang dakong bahin, ug ang imong pamilya magmando sa gamayng bahin.’

Dunay laing paagi si Jehova aron mapahibalo ang iyang desisyon. Samtang naglakaw ang sulugoon ni Solomon nga si Jeroboam, nagkita sila ni propetang Ahias. Gigisi ni Ahias ang iyang taas nga sinina, gibahin kini sa 12 ka piraso, ug giingnan si Jeroboam: ‘Kuhaon ni Jehova ang gingharian sa Israel gikan sa pamilya ni Solomon ug bahinon kini sa duha. Kuhaa kining 10 ka piraso kay ikaw ang maghari sa 10 ka tribo.’ Pagkahibalo ni Solomon, gusto niyang patyon si Jeroboam! Busa miikyas si Jeroboam paingon sa Ehipto. Sa ulahi, namatay si Solomon ug nahimong hari ang iyang anak nga si Rehoboam. Busa mibalik na si Jeroboam sa Israel.

 Ang mga lider sa Israel miingon kang Rehoboam: ‘Kon maayo ang imong pagtratar sa katawhan, mounong sila nimo.’ Pero ang batan-ong mga amigo ni Rehoboam miingon: ‘Kinahanglang estrikto ka nila! Hatagi silag daghang trabaho!’ Gisunod ni Rehoboam ang giingon sa iyang mga amigo. Daotan ang iyang pagtratar sa mga tawo, busa mirebelde sila. Ilang gihimong hari si Jeroboam sa 10 ka tribo, nga sa ulahi nailhang gingharian sa Israel. Ang nahibiling duha ka tribo gitawag nga gingharian sa Juda, ug maunongon sila kang Rehoboam. Nabahin na ang 12 ka tribo sa Israel.

Dili mosugot si Jeroboam nga mosimba ang iyang katawhan didto sa Jerusalem, nga sakop sa gingharian ni Rehoboam. Nahibalo ba ka ngano? Nahadlok si Jeroboam nga morebelde sila kaniya ug modapig kang Rehoboam. Busa naghimo siyag duha ka bulawang baka ug giingnan ang katawhan: ‘Layo kaayo ang Jerusalem. Dinhi na lang mo simba.’ Gisimba sa katawhan ang bulawang mga baka ug gikalimtan na pod nila si Jehova.