Mfịna ikodụhe ke Israel ini Edidem Solomon okokponode Jehovah. Edi Solomon ama ọdọ ediwak iban emi mîkotoho Israel, emi ẹkenyụn̄ ẹkponode nsunsu abasi. Enye ama okpụhọde sụn̄sụn̄, onyụn̄ ọtọn̄ọ nditiene n̄kpono nsunsu abasi. Jehovah ama ayat esịt etieti onyụn̄ ọdọhọ enye ete: ‘Ẹyebọ ubon fo ubọn̄ Israel ẹbahade ke itie iba. Nyọnọ asan̄autom fo n̄kan̄ emi okponde akan, ndien ubon fo ẹdikara n̄kan̄ emi ekpride akan.’

Jehovah ama anam n̄kpọ en̄wen man ẹdiọn̄ọ ke imọ imọn̄ ibahade obio ubọn̄ Israel. Asan̄autom Solomon kiet emi ekekerede Jeroboam ama osobo prọfet Ahijah ke usụn̄. Ahijah ama awak ọfọn̄idem esie ke itie 12 onyụn̄ ọdọhọ Jeroboam ete: ‘Jehovah ọyọbọ ubon Solomon obio ubọn̄ Israel abahade iba. Da mbak duop koro afo edikara esien Israel duop.’ Ini Solomon okopde n̄kpọ emi, enye ama oyom ndiwot Jeroboam. Edi Jeroboam ama efehe aka Egypt. Nte ini akakade Solomon ama akpa, ndien Rehoboam eyen esie ama ada itie esie. Jeroboam ama ekere ke edi se imọ ifiak inyọn̄ Israel.

 Mbiowo Israel ẹma ẹdọhọ Rehoboam ẹte: ‘Edieke akamade mme owo ọfọn, mmọ ẹyesụk ibuot ẹnọ fi.’ Edi n̄kparawa emi ẹkedide mme ufan esie ẹma ẹdọhọ enye ẹte: ‘Kama mmọ ke ọkpọsọn̄ ubọk! Nọ mmọ utom okpon akan se ete fo ekesinọde!’ Rehoboam akanam se mme ufan esie ẹketịn̄de. Enye ama ọdiọk uwem ye nditọ Israel, ndien oro ama anam esien duop ke Israel ẹsọn̄ ibuot ye enye. Mmọ ẹma ẹmek Jeroboam ẹte akara mmimọ. Ẹkekot esien duop oro obio ubọn̄ Israel, ẹkot esien iba eken obio ubọn̄ Judah. Mbon Judah ẹkeda ye Rehoboam. Esien Israel 12 ikadianake kiet aba.

Jerusalem ekesịne ọnọ Rehoboam. Jeroboam ikoyomke ikọt esie ẹka Jerusalem ẹketuak ibuot sia enye ekekere ke mmọ ẹkpeka do, ke mmọ ẹyewọn̄ọde ẹda ye Rehoboam. Ntre enye ama ada gold obot nditọ enan̄ iba onyụn̄ ọdọhọ ikọt esie ete: ‘Jerusalem ọniọn̄ usụn̄ akaha. Ẹmekeme ndituak ibuot mi.’ Mme owo ẹma ẹtọn̄ọ ndituak ibuot nnọ nditọ enan̄ oro, ẹnyụn̄ ẹfiak ẹfre Jehovah.