Be ni Solomon jáa Yehowa lɛ, Israel maŋ lɛ ná toiŋjɔlɛ. Shi Solomon kɛ yei ni jɛ maji krokomɛi anɔ bote gbalashihilɛ mli. Fiofio lɛ, Solomon tsake ni lɛ hu ebɔi amagai jamɔ. Yehowa mli fu lɛ, ni ekɛɛ lɛ akɛ: ‘Mahe Israel maŋ lɛ kɛjɛ oweku lɛ dɛŋ ni maja mli enyɔ. Mikɛ fã ni da lɛ baahã otsuji lɛ ateŋ mɔ kome, ni oweku lɛ baaye fã ni edaaa lɛ nɔ.’

Yehowa tsɔ gbɛ kroko nɔ ema nɔ ni ekɛɛ Solomon lɛ nɔ mi. Solomon tsulɔ ko ni atsɛɔ lɛ Yeroboam lɛ nyiɛ gbɛ kɛmiiya he ko ni ekɛ gbalɔ ko ni atsɛɔ lɛ Ahiya lɛ kpe. Ahiya gbala etade nɔhaanɔ lɛ mli kukuji 12 ni ekɛɛ Yeroboam akɛ: ‘Yehowa baahe Israel maŋtsɛyeli lɛ kɛjɛ Solomon weku lɛ dɛŋ ni ebaaja mli enyɔ. Kɔlɔmɔ atade kukuji nɛɛ nyɔŋma, ejaakɛ bo obaaye akutsei nyɔŋma lɛ nɔ maŋtsɛ.’ Be ni Maŋtsɛ Solomon nu enɛ lɛ, ekpɛ eyiŋ akɛ ebaagbe Yeroboam! No hewɔ lɛ, Yeroboam jo foi kɛtee Ejipt. Sɛɛ mli lɛ, Solomon gbo, ni ebi nuu Rehoboam baye esɛɛ akɛ maŋtsɛ. Yeroboam na akɛ ebaanyɛ eku esɛɛ kɛba Israel agbɛnɛ.

Israel onukpai lɛ kɛɛ Rehoboam akɛ: ‘Kɛ́ okɛ maŋbii lɛ ye jogbaŋŋ lɛ, amɛbaasɔmɔ bo.’ Shi Rehoboam nanemɛi  oblahii lɛ kɛɛ lɛ akɛ: ‘Esa akɛ oyitsoŋ awa yɛ maŋbii lɛ anɔ! Hã amɛtsu nii waa fe bɔ ni amɛtsuɔ bianɛ lɛ!’ Rehoboam bo oblahii lɛ toi, ni ehã etɔ maŋbii lɛ waa. No hewɔ lɛ, amɛ hu amɛtse ehiɛ atua. Amɛwó Yeroboam akutsei nyɔŋma lɛ nɔ maŋtsɛ. Sɛɛ mli lɛ, abale akutsei nyɔŋma lɛ akɛ Israel maŋtsɛyeli lɛ, ni abale akutsei enyɔ ni eshwɛ lɛ akɛ Yuda maŋtsɛyeli lɛ. Yuda maŋtsɛyeli lɛ mli bii lɛ tee nɔ amɛhi Rehoboam shishi. Nɛkɛ ji bɔ ni fee ni aja Israel akutsei 12 lɛ mli enyɔ.

Yeroboam sumɔɔɔ ni emaŋbii lɛ yajáa Nyɔŋmɔ yɛ Yerusalem. Ani ole nɔ hewɔ? Yerusalem yɛ Rehoboam maŋtsɛyeli lɛ mli. No hewɔ lɛ, Yeroboam she gbeyei akɛ kɛ́ emaŋbii lɛ tee jɛmɛ lɛ, amɛbaashi lɛ ni amɛyafi Rehoboam sɛɛ. No hewɔ lɛ, ekɛ shika tsuru fee tsinabi amagai enyɔ, ni ekɛɛ emaŋbii lɛ akɛ: ‘Yerusalem jekɛ tsɔ. Nyɛbaanyɛ nyɛjá Yehowa yɛ biɛ.’ Maŋbii lɛ bɔi amagai lɛ jámɔ, ni amɛhiɛ kpa Yehowa nɔ ekoŋŋ.