Sang ginasimba ni Solomon si Jehova, may kalinong sa Israel. Pero ginpangasawa ni Solomon ang madamo nga babayi halin sa iban nga pungsod nga nagasimba sa butig nga mga dios. Amat-amat nga nagbag-o si Solomon, kag sang ulihi nagsimba man sia sa butig nga mga dios. Naakig si Jehova. Ginsilingan niya si Solomon: ‘Kuhaon ko ang Israel sa imo pamilya kag tungaon ini sa duha. Ang daku nga bahin ihatag ko sa imo alagad, kag ang gamay nga bahin, pagagamhan sang imo pamilya.’

Gin-athag ni Jehova ang iya desisyon sa lain naman nga paagi. Ang alagad ni Solomon nga si Jeroboam nagalakat sa dalan sang nasugata niya si manalagna Ahias. Gingisi ni Ahias ang iya bayo sa 12 ka bahin kag ginsilingan si Jeroboam: ‘Kuhaon ni Jehova ang ginharian sang Israel sa pamilya ni Solomon kag tungaon ini sa duha. Kuhaa ang napulo ka bahin sini bangod mangin hari ka sang napulo ka tribo.’ Sang nabalitaan ini ni Hari Solomon, gusto niya patyon si Jeroboam! Gani nalagyo si Jeroboam sa Egipto. Sang ulihi, napatay si Solomon kag ang iya bata nga si Rehoboam ang nangin hari. Gani, naghunahuna si Jeroboam nga puede na sia makabalik sa Israel.

 Ang mga gulang sang Israel nagsiling kay Rehoboam: ‘Kon maayo ang ginahimo mo sa sini nga katawhan, magaunong sila sa imo.’ Pero ang pamatan-on niya nga mga abyan nagsiling: ‘Dapat mangin estrikto ka sa katawhan! Dugangi pa gid ang ila obra!’ Ginsunod ni Rehoboam ang ginsiling sang mga pamatan-on. Nangin mapintas sia sa mga tawo, gani nagrebelde sila. Ginhimo nila si Jeroboam nga hari sang napulo ka tribo, nga gintawag nga ginharian sang Israel. Kag ang duha ka tribo gintawag nga ginharian sang Juda, kag nangin mainunungon sila kay Rehoboam. Natunga na ang 12 ka tribo sang Israel.

Indi gusto ni Jeroboam nga magsimba ang katawhan sa Jerusalem, nga bahin sang ginharian ni Rehoboam. Kabalo ka bala kon ngaa? Nahadlok si Jeroboam nga basi indi na magsunod sa iya ang mga tawo kag magsuportar kay Rehoboam. Gani naghimo sia sing duha ka bulawan nga tinday nga baka kag nagsiling sa iya katawhan: ‘Malayo katama ang Jerusalem. Diri na lang kamo magsimba.’ Gani ginsimba sang katawhan ang bulawan nga tinday nga baka kag nalipatan na naman nila si Jehova.