Thaum Xalaumoo ntseeg Yehauvas, cov Yixayee muaj kev thaj yeeb thiab nyob kaj siab lug. Tiamsis Xalaumoo mus yuav coob tus pojniam txawv tebchaws uas tsis ntseeg Yehauvas. Ntev zuj zus, Xalaumoo cia li mus pe hawm tej dab mlom lawm thiab. Vajtswv Yehauvas thiaj li chim heev thiab hais rau Xalaumoo tias: ‘Kuv yuav muab lub tebchaws Yixayee dua ntawm koj tsev neeg mus thiab muab faib ua 2 lub. Kuv yuav muab lub loj rau koj ib tug tub qhe kav. Tseg lub me rau koj tsev neeg kav xwb.’

Yehauvas puas yuav ua raws li nws hais tseg ntawd? Xalaumoo ib tug tub qhe hu ua Yelaunpau-as txawm ntsib Ahiya ntawm ib tog kev. Ahiya muab nws lub tsho tshiab dua ua 12 daim thiab hais rau Yelaunpau-as tias: ‘Yehauvas yuav dua lub tebchaws Yixayee ntawm Xalaumoo tsev neeg mus thiab muab faib ua 2 lub. Cia li nqa 10 daim no mus vim koj yuav ua vajntxwv kav 10 xeem Yixayee.’ Thaum Vajntxwv Xalaumoo hnov li ntawd, nws xav muab Yelaunpau-as tua pov tseg! Yelaunpau-as thiaj khiav mus rau nram Iyi tebchaws lawm. Tom qab Xalaumoo tuag lawm, ces nws tus tub Lehaunpau-as sawv ua vajntxwv kav. Yog li ntawd, Yelaunpau-as thiaj rov qab los nyob hauv tebchaws Yixayee.

 Yixayee cov txwj laus hais rau Lehaunpau-as tias: ‘Yog koj ua zoo rau cov pejxeem, lawv yuav npuab siab koj.’ Tiamsis Lehaunpau-as cov npoj uas hluas li nws hais tias: ‘Koj yuav tsum ua nyuaj rau cov pejxeem. Hais kom lawv hajyam siv zog ua haujlwm ntxiv!’ Lehaunpau-as txawm ua raws li nws cov npoj tau hais. Nws ua phem heev rau cov pejxeem. Yog li ntawd, cov pejxeem thiaj tawm tsam nws. Cov pejxeem thiaj muab Yelaunpau-as tsa ua vajntxwv kav 10 xeem, hu ua Yixayee. Tshuav 2 xeem, hu ua Yuda, thiaj npuab siab Lehaunpau-as xwb. Zaum no 12 xeem thiaj li raug muab faib ua 2 pab lawm.

Yelaunpau-as tsis xav kom nws cov pejxeem mus pe hawm Yehauvas hauv Yeluxalees. Yog vim li cas? Yelaunpau-as ntshai tsam cov pejxeem hloov siab mus tuaj Lehaunpau-as tog lawm. Yog li ntawd, Yelaunpau-as thiaj muab kub ua 2 tug mlom nyuj thiab hais rau cov pejxeem tias: ‘Yeluxalees nyob deb dhau lawm. Peb mam li teev tiam ntawm no xwb.’ Cov pejxeem thiaj tso Yehauvas tseg thiab pib pe hawm tej dab mlom lawm.