GĨCUNJĨ KĨA 45
Ũthamaki Kũgayũkana
Hĩndĩ ĩrĩa yothe Suleimani aathathayagia Jehova, Aisiraeli maatũũraga na thayũ. No Suleimani nĩ aahikirie atumia aingĩ a ndũrĩrĩ na maahoyaga mĩhianano. Aathiire aagarũrũkĩte kahora kahora nginya o nake akĩambĩrĩria kũhoya mĩhianano. Jehova nĩ aarakarire mũno. Eerire Suleimani ũũ: ‘Ũthamaki wa Isiraeli nĩ ũkweherio famĩlĩ-inĩ yaku na ũgayanio maita merĩ. Gĩcunjĩ kĩrĩa kĩnene kĩaguo ngũhe ndungata ĩmwe yaku, nayo famĩlĩ yaku ĩgũtigwo na gĩcunjĩ kĩrĩa kĩnini.’
Jehova nĩ onanirie itua rĩake na njĩra ĩngĩ. Ndungata ĩmwe ya Suleimani yetagwo Jeroboamu nĩ yacemanirie na mũnabii wetagwo Ahija njĩra-inĩ. Ahija aatarũrangire nguo yake ya igũrũ icunjĩ 12 na akĩra Jeroboamu ũũ: ‘Jehova nĩ ekweheria ũthamaki wa Isiraeli harĩ famĩlĩ ya Suleimani na aũgayanie maita merĩ. Oya icunjĩ ici ikũmi tondũ nĩwe ũgũtuĩka mũthamaki wa mĩhĩrĩga ikũmi.’ Mũthamaki Suleimani nĩ aaiguire ũhoro ũcio na akĩbanga kũũraga Jeroboamu. Nĩ ũndũ ũcio Jeroboamu nĩ orire na agĩthiĩ Misiri. Thutha wa ihinda, Suleimani nĩ aacokire agĩkua na mũrũwe Rehoboamu agĩtuĩka mũthamaki. Hĩndĩ ĩyo nĩrĩo Jeroboamu onire atĩ no acoke Isiraeli.
Athuri a Isiraeli meerire Rehoboamu ũũ: ‘Angĩkorũo nĩ ũrĩkaga andũ maũndũ mega nĩ megũtuĩka ehokeku harĩ we.’ No anake arĩa maarĩ arata a Rehoboamu maamwĩrire ũũ: ‘Wagĩrĩirũo kũritũhĩria andũ ũtũũro! Ũreke marute wĩra mũritũ biũ!’ Rehoboamu aarũmĩrĩire ũtaaro wa anake arĩa maarĩ arata ake. Nĩ aahinyĩrĩirie andũ mũno nao makĩmũremera. Maatuire Jeroboamu mũthamaki wa mĩhĩrĩga ĩrĩa ikũmi yacokire gwĩtwo ũthamaki wa Isiraeli. Mĩhĩrĩga ĩyo ĩngĩ ĩrĩ yetirũo ũthamaki wa Juda na matũũrire marĩ ehokeku harĩ Rehoboamu. Mĩhĩrĩga ĩrĩa 12 ya Isiraeli nĩ yagayũkanirio.
Jeroboamu ndeendaga andũ arĩa aathamakagĩra mathiĩ Jerusalemu kũhoya Jehova, tondũ nĩ Rehoboamu wathanaga kuo. Hihi nĩ ũĩ eekire ũguo nĩkĩ? Onaga ta andũ mathiĩ kuo mangĩagarũrũkire manyite Rehoboamu mbaru. Nĩ ũndũ ũcio agĩthondeka njaũ igĩrĩ cia thahabu na akĩra andũ ũũ: ‘Jerusalemu nĩ kũraihu mũno. No mũhoere o gũkũ.’ Andũ nĩ maambĩrĩirie kũhoya njaũ icio na makĩriganĩrũo nĩ Jehova rĩngĩ.
“Mũtikohwo icoki rĩmwe na andũ matarĩ etĩkia. Tondũ rĩrĩ, nĩ ũiguano ũrĩkũ ũkoragwo ho gatagatĩ ka ũthingu na uuni-watho? . . . Kana rĩrĩ, nĩ ũndũ ũrĩkũ mũndũ mwĩtĩkia manyitanagĩra na mũndũ ũtarĩ mwĩtĩkia?”—2 Akorintho 6:14, 15
Icunjĩ Ingĩ Hihi Ũngĩenda Gũthoma
KANDI CIA BIBILIA
Kandi ya Bibilia ya Suleimani
Cuurũria kandi ĩno ya Bibilia, na wĩrute maũndũ makĩria megiĩ Mũthamaki mũgĩ Suleimani.
