Сүлеймен патша Ехобаға ғибадат еткен кезде, Исраилде тыныштық болды. Бірақ ол басқа елден көп әйел алды. Сол әйелдер пұттарға табынатын. Кейін Сүлеймен де бірте-бірте өзгеріп, пұттарға табына бастады. Ехоба бұған қатты ашуланды. Ол Сүлейменге: “Исраилді сенің әулетіңнен тартып алып, екіге бөлемін. Көп бөлігін қызметшіңе беремін, ал сенің әулетің аз бөлігіне ғана билік етеді”,— деді.

Ехоба айтқан сөздерін орындайтынын былай көрсетті: Сүлейменнің қызметшісі Еробоғам жолда келе жатқанда, Ахия пайғамбарды кезіктірді. Сонда Ахия үстіндегі шапанын 12 бөлікке жыртты да, Еробоғамға: “Ехоба Исраил патшалығын Сүлейменнің әулетінен тартып алып, екіге бөледі. Шапанның 10 бөлігін сен ал, өйткені он рудың патшасы сен боласың”,— деді. Сүлеймен патша бұл жайлы естігенде, Еробоғамды өлтірмек болды. Бірақ Еробоғам Мысырға қашып кетті. Уақыт өте Сүлеймен қайтыс болып, оның орнына ұлы Рохабоғам патша болды. Сол кезде Еробоғам қорықпай Исраилге қайтып келді.

Исраилдің ақсақалдары Рохабоғамға: “Сен халыққа мейірімді болсаң, олар саған адал болады”,— деді.  Ал Рохабоғамның құрдастары болса: “Қатал бол! Халыққа одан бетер көп жұмыс істет”,— деді. Рохабоғам достарының айтқанын тыңдап, халыққа қатал болды. Сондықтан исраилдің он руы көтеріліске шықты. Олар Еробоғамды өздеріне патша етіп қойды. Сөйтіп, он ру Исраил патшалығы, ал қалған екі ру Яһуда патшалығы деп атала бастады. Осылай Исраилдің 12 руы екіге бөлініп кетті.

Еробоғам халықтың Иерусалимге барып ғибадат еткенін қаламады. Өйткені Иерусалим қаласы Рохабоғамның патшалығында орналасқан еді. Еробоғам халық одан кетіп қалып, Рохабоғамның жағына шығып кетеді деп қорықты. Сондықтан ол халыққа екі алтын бұзау жасап берді де: “Иерусалим бұл жерден өте алыс. Осы жерде-ақ ғибадат етсеңдер болады”,— деді. Сөйтіп, халық алтын бұзауларға табынып, қайтадан Ехобаны ұмытып кетті.