We Sɔlɔmɔn bin de wɔship Jiova, pis bin de na Izrɛl. Bɔt Sɔlɔmɔn bin mared bɔku uman dɛn we kɔmɔt na ɔda land dɛn, we de wɔship lay lay gɔd dɛn. Smɔl smɔl, Sɔlɔmɔn bin chenj ɛn bigin fɔ wɔship lay lay gɔd dɛn. Jiova bin vɛks bad. I tɛl Sɔlɔmɔn se: ‘A go pul Izrɛl kɔmɔt na una famili in an, ɛn a go sheb am to tu. A go gi bɔku pat fɔ rul to wan pan yu savant dɛn, ɛn yu famili go rul di smɔl pat.’

Jiova bin mek dɛn no klia wan wetin i dɔn disayd fɔ du wan ɔda we bak. Wan pan Sɔlɔmɔn in savant dɛn we nem Jɛroboam bin de travul ɛn i mitɔp wan prɔfɛt we nem Aayja. Aayja bin chɛr in klos to 12 pat dɛn ɛn tɛl Jɛroboam se: ‘Jiova go pul di kiŋdɔm na Izrɛl kɔmɔt na Sɔlɔmɔn in famili in an ɛn sheb am to tu. Tek tɛn pat pan dɛn klos dɛn ya, bikɔs yu go bi kiŋ fɔ tɛn trayb dɛn.’ Kiŋ Sɔlɔmɔn bin yɛri bɔt dis, ɛn i bin want fɔ kil Jɛroboam! So Jɛroboam bin rɔnawe go na Ijipt. As tɛm de go, Sɔlɔmɔn bin day ɛn in bɔypikin Rɛoboam bin bi kiŋ. Dɔn Jɛroboam bin tink se na di rayt tɛm fɔ mek i go bak na Izrɛl.

 Di bigman dɛn na Izrɛl bin tɛl Rɛoboam se: ‘If yu trit di pipul dɛn fayn, dɛn nɔ go kɔmɔt biɛn yu.’ Bɔt Rɛoboam in yɔŋ padi dɛn tɛl am se: ‘Yu fɔ rili trit di pipul dɛn bad! Gi dɛn mɔ wok fɔ du!’ Rɛoboam bin fala in yɔŋ padi dɛn advays. I bin de trit di pipul dɛn bad, so dat mek dɛn tɔn agens am. Dɛn mek Jɛroboam bi kiŋ fɔ di tɛn trayb dɛn, we dɛn bin leta kɔl di kiŋdɔm na Izrɛl. Dɛn bin kɔl di ɔda tu trayb dɛn di kiŋdɔm na Juda, ɛn dɛn nɔ bin kɔmɔt biɛn Rɛoboam. Di 12 trayb na Izrɛl bin sheb.

Jɛroboam nɔ bin want in pipul dɛn fɔ go wɔship na Jerusɛlɛm, we bin de na Rɛoboam in kiŋdɔm. Yu no wetin mek? Jɛroboam bin de fred se di pipul dɛn go tɔn dɛn bak pan am ɛn bigin sɔpɔt Rɛoboam. So i mek tu kaw pikin dɛn wit gold ɛn tɛl di pipul dɛn se: ‘Jerusɛlɛm rili de fa. Una kin wɔship na ya.’ Di pipul dɛn bigin fɔ wɔship di kaw dɛn we i mek wit gold ɛn fɔgɛt bɔt Jiova bak.