တၢ်မၤလိ ၄၅
ဘီမုၢ်ဘၣ်တၢ်နီၤဖးအီၤ
ဖဲစီၤၡလိၤမိၤဘူၣ်ထီၣ်ဘါထီၣ်ဝဲ ယဟိဝၤယွၤအခါ ပှၤအံၣ်စရ့လးဖိတဖၣ်အိၣ်မူဘၣ်ဝဲ မုာ်မုာ်ခုၣ်ခုၣ်လီၤ. ဘၣ်ဆၣ် စီၤၡလိၤမိၤန့ၣ် ဟံးန့ၢ်ဝဲအမါအါဂၤလၢ ထံဂၤကီၢ်ဂၤလီၤ. ဒီးအမါတဖၣ်အံၤ ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်လီၤ. ဒ်တၢ်ဆၢကတီၢ် လဲၤပူၤကွံာ်အသိး စီၤၡလိၤမိၤစးထီၣ်ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်စ့ၢ်ကီးလီၤ. ယဟိဝၤယွၤသးဒိၣ်ထီၣ်ဝဲ စီၤၡလိၤမိၤလီၤ. ကစၢ်ယွၤတဲဘၣ်အီၤလၢ– ‘ယကနီၤဖးပှၤအံၣ်စရ့လးဖိခံဖုလီၤ. ပှၤအံၣ်စရ့လးဖိလၢ အနီၣ်ဂံၢ်အါတဖုန့ၣ် ယကဟ့ၣ်လီၤလၢ နခ့နပှၤတဂၤအစုပူၤလီၤ. မ့မ့ၢ် ပှၤအံၣ်စရ့လးဖိလၢအနီၣ်ဂံၢ်စှၤတဖုန့ၣ် ယကဟ့ၣ်လီၤနဖိနလံၤလီၤ.’
ယဟိဝၤယွၤကမၤဝဲဒ်န့ၣ်န့ၣ် အဝဲပာ်ဖျါထီၣ်ဝဲလၢ ကျဲအဂၤတဘိစ့ၢ်ကီးလီၤ. ဖဲစီၤၡလိၤမိၤအခ့အပှၤ စီၤယၤရၤဘၣ် လဲၤတၢ်လၢကျဲအခါ အဝဲထံၣ်လိာ်အသးဒီး ဝံအဃံယၤန့ၣ်လီၤ. ဝံအဃံယၤဖှီဝဲအဆ့ကၤတဆံခံက့ ဒီးအဝဲတဲဘၣ်စီၤယၤရၤဘၣ်လၢ– ‘ယဟိဝၤယွၤ ကဟံးထီၣ်ကွံာ်ဘီမုၢ်လၢ စီၤပၤၡလိၤမိၤ အအိၣ် ဒီးနီၤဖးဝဲဘီမုၢ်အံၤခံက့လီၤ. ခီဖျိလၢ နကကဲထီၣ်ဘၣ်စီၤပၤလၢ ပှၤအံၣ်စရ့လးဖိ အဒူၣ်တဆံအဖီခိၣ်အဃိ ဟံးန့ၢ်ယဆ့ကၤအက့တဆံအံၤတက့ၢ်.’ ဖဲစီၤပၤၡလိၤမိၤ နၢ်ဟူဘၣ်တၢ်ဂ့ၢ်အံၤအခါ အဝဲအဲၣ်ဒိးမၤသံဝဲစီၤယၤရၤဘၣ်လီၤ. လၢတၢ်န့ၣ်အဃိ စီၤယၤရၤဘၣ်ဘၣ်လဲၤဃ့ၢ်ဝဲဆူ ကီၢ်အဲၤကူပတူးအပူၤလီၤ. လၢခံ ဖဲစီၤၡလိၤမိၤသံဝံၤအလီၢ်ခံ အဖိခွါစီၤရဃၤဘၣ်ကဲထီၣ် စီၤပၤလၢအလီၢ်လီၤ. ဒီးစီၤယၤရၤဘၣ်သ့ၣ်ညါဝဲလၢ တၢ်အိၣ်သးဂ့ၤထီၣ်ဝဲလံအဃိ အဝဲဟဲက့ၤဝဲလၢကီၢ်အံၣ်စရ့လးအပူၤလီၤ.
ပှၤအံၣ်စရ့လး သူၣ်က့သးပှၢ်တဖၣ် တဲဘၣ်စီၤရဃၤဘၣ်လၢ– ‘နမ့ၢ်ရ့ဒီးပှၤအံၣ်စရ့လးဖိတဖၣ်ဂ့ၤဂ့ၤန့ၣ် အဝဲသ့ၣ်ကတီလၢနဖီခိၣ်လီၤ.’ ဘၣ်ဆၣ် စီၤရဃၤဘၣ်အတံၤသကိးလၢ အသးစၢ်တဖၣ်တဲဘၣ်အီၤလၢ– ‘ပှၤဂီၢ်မုၢ်တဖၣ်အံၤ နကဘၣ်မၢ အဝဲသ့ၣ်မၤတၢ်မၤဆူၣ်န့ၢ်အလီၢ်လီၤ.’ စီၤရဃၤဘၣ်မၤထွဲဝဲ အတံၤသကိးလၢအသးစၢ်တဖၣ် အတၢ်ဟ့ၣ်ကူၣ်လီၤ. ဒီးမ့ၢ်လၢပှၤဂီၢ်မုၢ်တဖၣ် ဘၣ်မၤတၢ်နးမးအဃိ အဝဲသ့ၣ်ထီဒါဝဲ စီၤရဃၤဘၣ်လီၤ. ဝံၤဒီးပှၤဂီၢ်မုၢ်တဖၣ် ပာ်ထီၣ်ဝဲစီၤယၤရၤဘၣ်လၢ စီၤပၤလၢပှၤအံၣ်စရ့လးဖိ အဒူၣ်တဆံအဖီခိၣ်လီၤ. ပှၤအံၣ်စရ့လးဖိအဒူၣ်တဆံန့ၣ် ဘၣ်တၢ်ကိးအီၤလၢ အံၣ်စရ့လးအဘီမုၢ်လီၤ. မ့မ့ၢ်ပှၤအံၣ်စရ့လးဖိခံဒူၣ်န့ၣ် ဘၣ်တၢ်ကိးအီၤလၢ ယူဒၤအဘီမုၢ် ဒီးအဝဲသ့ၣ်တီဝဲလၢ စီၤရဃၤဘၣ်အဖီခိၣ်န့ၣ်လီၤ. ခဲအံၤ ပှၤအံၣ်စရ့လးဖိတဆံခံဒူၣ်အံၤ လီၤဖးဝဲလံ.
စီၤယၤရၤဘၣ်န့ၣ် တအဲၣ်ဒိးဝဲလၢအပှၤဂီၢ်မုၢ်တဖၣ် လဲၤဘူၣ်ထီၣ်ဘါထီၣ်တၢ်လၢ ဝ့ၢ်ယရူၤၡလ့ၣ်အပူၤဘၣ်. ဘၣ်မနုၤအဃိလဲၣ်န့ၣ် နသ့ၣ်ညါဧါ. မ့ၢ်လၢစီၤယၤရၤဘၣ်ဘၣ်ယိၣ်ဝဲလၢ အပှၤဂီၢ်မုၢ်တဖၣ်ကထီဒါက့ၤအီၤ ဒီးဆီၣ်ထွဲက့ၤစီၤရဃၤဘၣ်န့ၣ်လီၤ. အဃိ စီၤယၤရၤဘၣ်တ့ထီၣ်ဝဲ ဂီၤဖံးဖိခံဒုလၢထူ ဒီးတဲဘၣ်အပှၤဂီၢ်မုၢ်တဖၣ်လၢ– ‘ဝ့ၢ်ယရူၤၡလ့ၣ်န့ၣ် အိၣ်ဝဲဖးယံၤအဃိ သုဘူၣ်ထီၣ်ဘါထီၣ်တၢ်ဖဲအံၤသ့ဝဲလီၤ.’ ဝံၤဒီး ပှၤဂီၢ်မုၢ်တဖၣ်စးထီၣ်ဘူၣ်ထီၣ်ဘါထီၣ်ဝဲ ဂီၤဖံးဖိခံဒုအံၤ ဒီးအဝဲသ့ၣ်သးပ့ၤနီၣ်ကွံာ်ဝဲယဟိဝၤယွၤလီၤ.
“သုတယိးနီၣ်ယိးဘိဖုၣ်ထံၣ်ဖုၣ်ထီ ဒီးပှၤလၢအတစူၢ် တနာ်ဘၣ်တဖၣ်န့ၣ်တဂ့ၤ. အဂ့ၢ်ဒ်အံၤ, တၢ်တီတၢ်လိၤန့ၣ်, ဘၣ်ဃးဒီးတၢ်တတီတလိၤဘၣ်ဒ်လဲၣ် . . . ဒီးပှၤလၢအစူၢ်က့ၤနာ်က့ၤတၢ်, န့ၢ်ဘၣ်ဃုာ်အဂီၢ်ဒီးပှၤလၢ အတစူၢ်တနာ်ဘၣ်ဒ်လဲၣ်.”—၂ ကရံၣ်သူး ၆:၁၄, ၁၅