Apa Saromo nga karere Jehova, moIsraeli kwa kere mo mbili. Nye Saromo kwa ya kwere vakadi wovanzi wovanayirongo, ava ngava karere vakarunga woyimpempa. Kanunu-kanunu, Saromo nage ta ya tameke kukarera vakarunga owo. Jehova kwa handukire. Ta tantere Saromo asi: ‘Uhompa ngani u gaununa pavali nokuukugusa. Ngani gava mazimo murongo komukareli goge, ano ove ngani kusigira ko tupu mazimo gavali.’

Jehova kwa likidire hena etokoro lyendi monkedi zapeke. Mukareli gumwe gwaSaromo gedina Jerobiyamu kwa gendere monzira ta ligwanekere nomuporofete Ahiya. Muporofete Ahiya ta taura erwakani lyendi momaruha 12, nokutantera Jerobiyamu asi: ‘Jehova nga gusa uhompa kwaSaromo nokuugaununa pavali. Gusa po maruha 10, morwa ngo kara hompa gomazimo murongo.’ Apa ga yi zuvhire hompa Saromo kwa here kudipaga Jerobiyamu. Makura Jerobiyamu ta dukire koEgipite. Apa ga fire Saromo, munwendi gomugara Rehabiyamu ta kara hompa. Makura Jerobiyamu ta tengura koIsraeli.

 Masimbi goVaisraeli ta ga tantere Rehabiyamu asi: ‘Nsene ngo tekura nawa vantu, ngava ku limburukwa.’ Nye vakaume vendi wovadinkantu tava mu tantere asi: ‘Va tekura momudona. Va ninka ngava rugane unene.’ Rehabiyamu kwa kweme mapukururo govakaume vendi wovadinkantu. Age kwa tekwire vantu nonyanya makura tava mu rwanesa. Yipo va horowere Jerobiyamu a kare hompa gomazimo murongo aga ga ya divikwire asi uhompa waIsraeli. Ano mazimo gavali aga nga pangere Rehabiyamu kwa ya divikwire asi uhompa waJuda. Mazimo 12 gaIsraeli kwa ga gawinine.

Jerobiyamu kapi ga here vantu vendi va ze va ka kanderere koJerusarema, ezi za kere mouhompa waRehabiyamu. Ono diva asi morwasinke? Jerobiyamu kwa tjilire asi vantu kuvhura ngava tengure kwaRehabiyamu. Makura ta rugana nontwedu mbali dongorodo ta tantere vantu vendi asi: ‘KoJerusarema ure. Kuvhura mu kanderere moomu.’ Vantu tava tameke kukanderera nontwedu odo nokudivara Jehova.