Vava Solomo kasambilanga Yave, luvuvamu lwakala muna Isaele. Kansi, Solomo wasompa akento ayingi anzenza ana basambilanga e teke. Malembe-malembe, Solomo wasoba yo yantika mpe sambila e teke. Yave wafunga kikilu makasi. Wavovesa Solomo vo: ‘E Isaele ivambaneswa muna nzo aku yo kayaneswa mu ndambu zole. Ivana ndambu yanene kwa mosi muna selo yaku, e nzo aku isala ye ndambu yakete.’

Yave watoma kiesesa diaka nzengo zandi mu mpila yankaka. Mosi muna selo ya Solomo, i sia vo, Yerobame, mu nkangalu kakala vava kawanana yo Akiya wa ngunza. Akiya watiazuna mvuatu andi mu tini 12 yo vovesa Yerobame vo: ‘Yave okatula kintinu kia Isaele muna nzo a Solomo yo kayanesa kio mu ndambu zole. Bonga tini kumi muna tini yayi kadi okituka se ntinu a makanda kumi.’ Vava Solomo wa Ntinu kawá e diambu diadi, wazola vonda Yerobame. Muna kuma kiaki, Yerobame watinina kuna Engipito. Kuna kwalanda, Solomo wafwa, o Rekabame wa mwan’andi wakituka se ntinu. I bosi, Yerobame wamona vo e ntangwa ya vutuka kuna Isaele ifwene.

 Akuluntu a Isaele bavovesa Rekabame vo: ‘Avo otomene lunga-lunga o nkangu, bekulemvokela.’ Kansi, akundi a Rekabame ana bakala vo matoko ma ntel’andi bavova vo: ‘Ofwete kala nkwa ntim’a mbadi kwa nkangu. Ubakudikila diaka salu yangolo.’ O Rekabame walanda longi dia akundi andi amatoko. Wayantika bangika nkangu. Muna kuma kiaki, o nkangu wankolamena. Bakitula Yerobame se ntinu a makanda kumi oma mayikilwanga vo kintinu kia Isaele. E makanda mole mankaka mayikilwanga vo kintinu kia Yuda. O nkangu a kintinu kiaki walemvokelanga Rekabame. E makanda 12 ma Isaele mavambana.

O Yerobame kazolanga ko vo nkangu andi benda sambila kuna Yerusaleme, i sia vo, muna kintinu kia Rekabame. Nga ozeye ekuma? Yerobame wonga kakala wau vo nkangu ulenda vutuka kwa Rekabame yo kunyikama. Muna kuma kiaki, wavanga teke yole ya wolo ya wan’a ngombe yo vovesa nkangu vo: ‘E Yerusaleme kwandá kikilu ina. Nulenda kweno sambila okwaku.’ O nkangu wayantika sambila teke ya wolo yo vilakana diaka Yave.