Salumoni hanaasebeleza Jehova, nekubanga kozo mwa Isilaele. Kono anyala basali babañata bane bazwa kwa libaka lisili, mi basali bao nebalapela milimu ya maswaniso. Hanyinyani-hanyinyani, Salumoni acinca, mi ni yena akala kulapela milimu ya maswaniso. Jehova naanyemisizwe ki taba yeo. Kihaa li ku Salumoni: ‘Isilaele ukazwisiwa mwa lubasi lwahao mi uka kauhanywa kuba mibuso yemibeli. Nikafa kalulo yetuna ku yomuñwi wa batanga bahao, mi lubasi lwahao lukabusa kalulo yenyinyani.’

Jehova hape naatusize batu kuutwisisa hande katulo yahae ka nzila yeñwi. Yomuñwi wa batanga ba Salumoni, ili Jeroboami, naali mwa musipili hanaakopani ni mupolofita Akija. Akija apazula siapalo sahae liemba ze 12, mi ali ku Jeroboami: ‘Jehova ukazwisa Mubuso wa Isilaele kwa lubasi lwa Salumoni ni kuukauhanya mwa likalulo zepeli. Uunge liemba zelishumi ze kakuli ukaba mulena wa masika alishumi.’ Mulena Salumoni autwa taba yeo mi abata kubulaya Jeroboami! Kacwalo, Jeroboami asabela kwa Egepita. Hamulaho wa nako, Salumoni ashwa mi mwanaa hae wamushimani yabizwa Roboami amuyola fa bulena. Cwale Jeroboami abona kuli nekulukile kukutela kwa Isilaele.

 Baana-bahulu ba Isilaele kihaa bali ku Roboami: ‘Haiba ueza batu hande bakasepahala ku wena.’ Kono balikani bahae ba mitangana bali ku yena: ‘Uswanela kubahalifela! Ubasebelise ka taata!’ Roboami alatelela kelezo ya balikani bahae bane bali mitangana. Naanani lunya kwa batu, mi bamukwenuhela. Babeya Jeroboami fa bulena kuli abuse masika alishumi a Isilaele, ili mubuso one utobizwa mubuso wa Isilaele. Masika amañwi amabeli azibahala sina mubuso wa Juda, mi naazwezipili kusepahala ku Roboami. Masika a 12 a Isilaele nese akauhani.

Jeroboami naasalati kuli batu bahae baye kwa Jerusalema kuyo lapela, ili mona mone kubuseza Roboami. Kana mwaziba libaka? Jeroboami naaikalezwi kuli batu nebaka mufetuhela ni kuyemela Roboami. Kacwalo, aeza manamani amabeli a gauda mi abulelela sicaba kuli: ‘Kwa Jerusalema ki kwahule hahulu. Mwakona kulapelela ona kwanu.’ Batu bakala kulapela manamani amabeli ao mi balibala Jehova hape.