Solomone, kitatyi kyonso kyaādi utōta Yehova, mu Isalela mwādi ndoe. Inoko Solomone wāsongele bakaji bavule ba mu matanda angi, kadi bano bakaji bādi batōta bilezaleza. Solomone wāshintyile bityebitye, nandi waānza kutōta bilezaleza. Yehova wālobele bininge. Wāsapwila Solomone amba: ‘Isalela usa kusanwa ku kisaka kyobe ne kwabanibwa pabidi. Nsa kupa mwingidi obe umo kipindi kikatampe, inoko kisaka kyobe kikaludika’tu kipindi kityetye kete.’

Kadi Yehova wālombwele patōka butyibi bwandi mu muswelo mukwabo. Yeloboame, mwingidi umo wa Solomone, paādi wenda mu dishinda wētene na mupolofeto Ahiya. Ahiya wāsanine munkukumba wandi pa bipēta 12, ne kusapwila Yeloboame amba: ‘Yehova usa kutalula bulopwe bwa Isalela ku kisaka kya Solomone, ne kwibwabanya pabidi. Yata bipēta dikumi, mwanda abe usa kwikala mulopwe pa bisaka dikumi.’ Mulopwe Solomone pa kwivwana uno mwanda, kākimbe kwipaya Yeloboame! Penepo Yeloboame wānyemena ku Edipito. Mwenda mafuku, Solomone pa kufwa, wandi mwana Lehaboma wābikala bu mulopwe. Ebiya Yeloboame wāmona’mba pano ubwanya kujokela ku Isalela pampikwa mwanda.

 Bakulumpe ba Isalela bāsapwidile Lehaboma amba: ‘Shi wendeje bantu biyampe, nabo basa kukulamata.’ Ino balunda na Lehaboma bansongwalume bāmulombola’mba: ‘Ufwaninwe kwikala na kasumalomo pa bantu! Wibengidije’nka ne mingilo mikomo!’ Lehaboma wālonda madingi a balunda nandi bansongwalume. Wāsusula bantu, bantu nabo bāmutombokela. Bābikika Yeloboame bu mulopwe pa bisaka dikumi, bine byāyukene bu bulopwe bwa Isalela. Bisaka bibidi bikwabo nabyo byāyukene bu bulopwe bwa Yuda, kadi byāshele bilamete kudi Lehaboma. Pano bisaka 12 bya Isalela bibaabanibwa.

Yeloboame kādipo usaka bantu bandi bākatōtele mu Yelusalema, mwine mwādi bulopwe bwa Lehaboma. Le uyukile i mwanda waka? Yeloboame wādi utyina amba bantu bakamwalamuka kebakwatakanya Lehaboma. O mwanda wāpungile byana bya ñombe bibidi bya olo, ne kulombola bantu amba: ‘Ku Yelusalema i kulampe bininge. Tōtelai’nka muno.’ Bantu bāanza kutōta byana bya ñombe bya olo, bāilwa monka Yehova.