Omu Solomone alemeselenga Yehova, vaIsalele vatwaminenga mukuunda. Oloze Solomone ambachile mapwevo vavavulu vakumafuchi eka, kaha ava mapwevo valemeselenga makombelo. Solomone aputukile kwalumuka chindende chindende nakuputuka kulemesa makombelo. Yehova apihililile chikuma. Alwezele Solomone ngwenyi: ‘Nangukutambula wangana nakuufumisa kutanga yove nakuupanga havali. Nangukahana chihanda chachinene kuli ngamba yove, kaha kutanga yove nakukasala chihanda chachindende.’

Yehova alingile vyuma ahanjikile. Omu Yelovowame ngamba yaSolomone apwile nakuya mujila awanyine kapolofweto Ahiya. Kaha Ahiya apulile uvwalo wenyi wahelu muvihanda 12, nakulweza Yelovowame ngwenyi: ‘Yehova natambula wangana waIsalele kuli Solomone natanga yenyi nakuupangununa muvihanda vivali. Mbata evi vihanda 10, mwomwo mukapwa umwangana wamiyachi 10 yavaIsalele.’ Kahomu mwangana Solomone evwile mujimbu kana asakile kujiha Yelovowame. Echi chalingishile Yelovowame achinyine kuEjipitu. Mukuhita chalwola Solomone afwile, kaha mwanenyi Lehovowame aswanyine wangana waIse. Kaha Yelovowame akindulukile jino kuIsalele.

Vakulwane javaIsalele valwezele Lehovowame ngwavo: ‘Vatu navashishikanga kuli ove kachi nge muvayula kanawa.’ Oloze masepa  jaLehovowame vamulwezele ngwavo: ‘Watela kukaluhwishilanga vatu muchima nakuvazachisa chikuma!’ Lehovowame evwililile kuvyuma vamulwezele vakwavo vakweze. Ayanjishilenga chikuma vatu, kaha valikangile kuli ikiye. Ngocho, valingishile Yelovowame kupwa mwangana wamiyachi likumi kaha uze wangana vauvulukile jino ngwavo wangana wavaIsalele. Kaha Lehovowame asalile nawangana wamiyachi yivali uze vavulukilenga ngwavo wangana waYuta, kaha vatu vashishikile kuli ikiye. Ngocho eyi miyachi 12 yavaIsalele vayipangunwine.

Yelovowame kasakilenga vatu vayenga nakulemesela Kalunga kuYelusalemako, mwomwo ika? Mwomwo chihela kana chapwile muwangana waLehovowame. Shikaho, Yelovowame evwile woma ngwenyi pamo vatu jenyi navamwalumukila nakukundwiza Lehovowame. Ngocho, atengele vana vavangombe vaulu vavali nakulweza vatu ngwenyi: ‘KuYelusalema kunasuhu chikuma. Kaha munahase kulemesela Kalunga kuno.’ Ngocho, vatu vavulyamine Yehova nakuputuka kulemesa vaze vana vavangombe vaulu.