Lyonsi lino Solomoni wapepanga Yeova, umu Izlaeli mwayanga umutende. Nomba Solomoni watwazile anaci aingi ukufuma umupanga zyuze, nupya anaci yaa yapepanga ivilubi. Panono panono Solomoni nawe kwene watandike ukupepa ivilubi. Yeova wasosile sana. Waneenyile Solomoni ati: ‘Uwene uwa Izlaeli ndaufumya umu lupwa lwako nupya ulankanyiziwa umu viputulwa viili. Wenga uwa mu yaomvi yako alaateeka uku ciputulwa icikulupo, nupya uwa mulupwa lwako alaateeka uku ciputulwa icinonopo.’

Yeova waomvizye inzila na yuze pa kulenga vino wapingwilepo vimanyikwe. Lino Yeloboamu, wenga pa yaomvi yakwe Solomoni wapitanga mu museo wakomenkinye kasesema Ahiya. Ahiya walepwile icakuzwala cakwe umutumpilinsya 12 alino aneena Yeloboamu ukuti: ‘Yeova alapoka uwene uwa Ina Izlaeli ukufuma umu lupwa lwakwe Solomoni nu kuwankanya paili. Toola ivimpilinsya vii 10 pano wewe ulaya umwene wa mitundu 10.’ Lino Umwene Solomoni uvwile vii, walondanga ukukoma Yeloboamu. Fwandi Yeloboamu utukiile uku Ijipti. Lino papisile insita Solomoni wafwile, nupya Leoboamu umwana wakwe uwatandike ukuteeka. Lyene Yeloboamu waweni ukuti icilinga ukuswilila uku Izlaeli.

 Aikolo ya mu Izlaeli yaneenyile Leoboamu iyati: ‘Nga wakulatungulula ningo antu, yalaya aacumi kuli wewe.’ Lelo ya cuza acance yakwe Leoboamu yamuneenyile ati: ‘Utalinzile ukulauvwila antu uluse. Uleke yaomba ukucila na vino yaombanga.’ Leoboamu walondiile vino ya cuza yakwe ance yamuneenyile. Wali nu unkalwe uku yantu, fwandi yamupondokiile. Isile Yeloboamu ukuya umwene uwa mitundu 10, iizile imanyikwa ukuti uwene uwa Ina Izlaeli. Imitundu yuze iili yamwanga ukuti uwene wa Ayuda, nupya antu yatwalilile ukuya acumi kuli Leoboamu. Vikwene ali vino imitundu 12 iya Ina Izlaeli yankanyiziwe.

Yeloboamu ataalondanga ukuti antu yakwe yaaya umu kupepa uku Yelusalemu ukwali uwene wakwe Leoboamu. Uzye watumanya umulandu? Yeloboamu watiinanga ukuti antu yangamusangukila nu kutandika ukutungilila Leoboamu. Fwandi wapanzile utwana twa ng’ombe twili twakwe goldi nu kuneena antu ati: ‘Uku Yelusalemu ukutali. Mungaapepela kuno kwene.’ Antu yaatandike ukupepa utwana twa ng’ombe twakwe goldi nu kufutatila Yeova nupya.