Ilo aolepen iien ko Solomon ear kabuñ ñan Jeova, ear wõr aenõm̦m̦an ilo Israel. Ak tokãlik ear m̦areik elõñ kõrã jãn aelõñ ko jet, im kõrã rein pãleen rar kabuñ ñan ekjab ko. Jidik kõn jidik, Solomon ear oktak im ear jino kabuñ ñan ekjab kein. Jeova ear lukkuun illu ippãn. Innem ear ba ñan Solomon: ‘Inaaj bõk aelõñin Israel jãn baam̦le eo am̦, im bwij ko ie renaaj jepel ñan ruo aelõñ. Aelõñ eo el̦ap inaaj lel̦o̦k ñan juon iaan rijerbal ro am̦, ak aelõñ eo edik inaaj lel̦o̦k ñan baam̦le eo am̦.’

Jeova ear kaalikkarl̦o̦k pepe in an ilo bar juon wãween. Ke juon iaan rijerbal ro an Solomon etan Jeroboam ear etal ilo ial̦ eo an, ear iioon rũkanaan eo etan Ehaija. Ehaija ear kekõle kopã eo an ñan 12 m̦õttan im ear ba ñan Jeroboam: ‘Jeova enaaj bõk aelõñin Israel jãn baam̦le eo an Solomon, im enaaj jepel ñan ruo aelõñ. Bõk 10 iaan m̦õttan kein kõnke kwe eo kwõnaaj kiiñ ioon bwij ko 10.’ Ke Kiiñ Solomon ear roñ kõn men in, ear kõn̦aan m̦ane Jeroboam! Kõn men in, Jeroboam ear ko ñan Ijipt. Tokãlik, Solomon ear mej im l̦eo nejin etan Rehoboam ear bõk jikin. Kiiõ ear jako an Jeroboam mijak im ear ro̦o̦l ñan Israel.

 Em̦m̦aan ro rerũtto ilo Israel rar ba ñan Rehoboam: ‘El̦aññe enaaj em̦m̦an am̦ kõm̦m̦an ñan armej rein, renaaj tiljek ñan kwe.’ Ak l̦õm̦aro redikl̦o̦k m̦õttan Rehoboam rar ba ñane: ‘Kwõn kapen kien ko am̦ ñan armej ro! Kwõn kal̦apl̦o̦k aer jerbal!’ Rehoboam ear l̦oore naan ko an l̦õm̦arein m̦õttan. Ear lãj ñan armej ro, im armej ro ilo bwij ko 10 rar jum̦aiki im kairooje Jeroboam bwe en aer kiiñ. Bwij kein rar bõk ãt in aelõñin Israel. Ak ruo iaan bwij ko rar tiljek wõt ñan Rehoboam. Kar n̦aetan bwij kein ruo aelõñin Juda. Bwij ko 12 ilo Israel rar kiiõ jepel jãn doon.

Jeroboam ear jab kõn̦aan bwe armej ro an ren etal im kabuñ ilo Jerusalem, ijo aelõñ eo an Rehoboam ear pãd ie. Kwõjel̦ã ke etke? Kõnke Jeroboam ear l̦õmn̦ak bwe renaaj etal jãne im kobal̦o̦k ippãn Rehoboam. Kõn men in, ear kõm̦m̦ane ruo koon in kau gold im ear ba ñan armej ro: ‘Jerusalem elukkuun ettol̦o̦k. Kom̦win kabuñ wõt ijin.’ Innem armej ro rar jino kabuñ ñan koon in kau ko im rar bar mel̦o̦kl̦o̦ke Jeova.