Tá xi̱ndasakáʼnu ta̱ Salomón, Ndióxi̱ Jehová, va̱ʼaní xi̱ndoo na̱ ñuu Israel. Soo ta̱yóʼo ti̱ndaʼa̱ra xíʼin ku̱a̱ʼání ná ñaʼá ná inka ñuu, ná xi̱ndasakáʼnu ndióxi̱ vatá. Loʼo tá loʼo, ta̱ Salomón ki̱xaʼá ndásakáʼnura ndióxi̱ vatá. Jehová ni̱sa̱a̱níra ta ni̱ka̱ʼa̱nra: “Ndakiʼi̱n ña̱ reino ñuu Israel ndaʼa̱ na̱ veʼún ta nda̱taʼvíi̱ña nduuña u̱vi̱. Ña̱ káʼnuka taxii̱ña ndaʼa̱ iin ta̱ káchíñu nu̱ún, ta na̱ veʼún ndakiʼin ña̱ loʼoka”.

Jehová ke̱ʼéra inka ña̱ʼa ña̱ va̱ʼa kunda̱a̱-inina xa̱ʼa ña̱ ni̱ka̱ʼa̱nra. Iin ta̱ káchíñu nu̱ú ta̱ Salomón ta̱ naní Jeroboán nda̱kutáʼanra xíʼin ta̱ profeta Ahíya chí yichi̱. Ta̱ profeta níʼira iin ti̱ko̱to̱ káni̱ ta 12 ñáʼñu xa̱ʼnda válíraña. Ta ni̱ka̱ʼa̱nra xíʼin ta̱ Jeroboán: “Jehová va̱ása taxikara ña̱ koo na̱ veʼe ta̱ Salomón rey nu̱ú na̱ ñuu Israel ta ndataʼvíra ña̱ reino yóʼo u̱vi̱ nduuña. Kiʼin 10 ñáʼñu yóʼo, saáchi yóʼó kaʼndachíñu nu̱ú 10 na̱ ñuu”. Tá na̱kunda̱a̱-ini ta̱ rey Salomón ña̱yóʼo, xi̱kuni̱ra kaʼníra ta̱ Jeroboán. Xa̱ʼa ña̱yóʼo ta̱ Jeroboán xi̱nura ku̱a̱ʼa̱nra chí Egipto. Ni̱ya̱ʼa tiempo, ni̱xi̱ʼi̱ ta̱ Salomón ta se̱ʼera ta̱ Rehoboam ki̱xaʼá kúú rey. Ta̱ Jeroboán nda̱kanixi̱níra ña̱ kǒoka ña̱ ndoʼora ta ndi̱kóra ñuu Israel.

 Na̱ xi̱ku̱aʼa ñuu Israel ni̱ka̱ʼa̱nna xíʼin ta̱ Rehoboam: “Tá vií ná koo iniún xíʼin na̱ ñuu, nda̱kú koona xíʼún”. Na̱ migo ta̱ Rehoboam su̱ví na̱ xa̱a̱ chée kúúna ta ni̱ka̱ʼa̱nna xíʼinra: “Ndeéka kundi̱va̱ʼún xíʼinna, ná kachíñukana”. Ta̱ Rehoboam ka̱ndíxara ña̱ ni̱ka̱ʼa̱nna ta ku̱ndi̱va̱ʼara xíʼinna. Xa̱ʼa ña̱yóʼo na̱ ñuu nda̱ka̱xinna ta̱ Jeroboán ña̱ kuura rey nu̱ú 10 ña̱ ñuu. Ña̱ 10 ñuu yóʼo xi̱naníña reino ñuu Israel. Ta ña̱ inka u̱vi̱ ñuu xi̱naníña reino ñuu Judá ta nda̱kú ni̱xi̱yo inina xíʼin ta̱ Rehoboam. Ña̱yóʼo ku̱u tá nda̱taʼví na̱ 12 ñuu Israel.

Chí ñuu Jerusalén xa̱ʼndachíñu ta̱ Rehoboam. Ta̱ Jeroboán va̱ása nítaxira ku̱ʼu̱nna ndasakáʼnuna Jehová chí ñuu kán. ¿Á xíni̱ún nda̱chun? Saáchi ni̱yi̱ʼvíra ña̱ ki̱xaʼána kuniso̱ʼona ña̱ káʼa̱n ta̱ Rehoboam. Ta va̱ʼaka ke̱ʼéra u̱vi̱ si̱ndi̱ki̱ tí oro ta ni̱ka̱ʼa̱nra: “Ñuu Jerusalén xíkaní ndíka̱a̱ña, va̱ʼaka yóʼo ndasakáʼnundó tí si̱ndi̱ki̱ yóʼo”. Na̱ yiví xi̱niso̱ʼovana ña̱ ni̱ka̱ʼa̱nra ta tuku sa̱ndákoona Jehová.