Ipan nochi nopa xiuitl kema Salomón kiueyichijki Jehová, onkak tlaseuilistli ipan Israel. Teipa, mosiuajtik ininuaya miakej siuamej tlen sekinok altepemej katli kinueyichiuayayaj teotsitsij. Yeka Salomón yolik kikajtiajki Jehová, uan teipa nojkia pejki kinueyichiua nopa teotsitsij. Jehová tlauel kualanki uan kiiljuik: “Nijxelos motlanauatijkayo uan mochampoyouaj ayokmo tlanauatisej ipan Israel. Se motekipanojka tlanauatis ipan miak pilaltepetsitsij, uan mochampoyouaj san ipan se keski”.

Jehová kichijki se tlamantli tlen kinpaleuiskia ma kikuamachilikaj tlen kiijtojtoya. Jeroboam, se Salomón itekipanojka, yajtoya sejkanok uan ojtipa kipantik tlajtolpanextijketl Ahías. Ahías kikokototski iyoyo uan kikixtik 12 tlakokototstli, uan kiiljuik Jeroboam: “Jehová kixelos Salomón itlanauatijkayo uan ayokmo tlanauatisej san ichampoyouaj. Xijkui matlaktli tlakokototstli, pampa ta titlanauatis ipan matlaktli pilaltepetsitsij”. Kema Salomón kimatki tlen panotoya, kinejki kimiktis Jeroboam. Yeka Jeroboam mochololtik uan yajki Egipto. Teipa, kema Salomón mijki, ikone Roboam pejki tlanauatia. Uan Jeroboam tlakuepilik Israel pampa moiljuiyaya ayokmo tleno kichiuiliskiaj.

Teipa, ueuejtlakamej ipan Israel kiiljuijkej Roboam: “Tlaj tikinchiuilis  maseualmej tlen kuali, nochipa mitstlepanitasej”. Uan Roboam iuampoyouaj katli nojua telpokamej eliyayaj, kiiljuijkej: “Moneki tikintlaijiyouiltis maseualmej. Xikinchiualti ma tekitikaj”. Roboam kintlakakilik nopa telpokamej uan tlauel tetlaijiyouiltik. Yeka ayokmo kitlepanitakej uan kitlalijkej Jeroboam ma tlanauati ipan matlaktli pilaltepetsitsij. Nopa matlaktli pilaltepetsitsij kitokaxtijkej Israel itlanauatijkayo. Uan nopa ome pilaltepetsitsij kitokaxtijkej Judá itlanauatijkayo, uan nopaya nojua kikajkej Roboam ma tlanauati. Kej nopa moxelok nopa 12 pilaltepetsitsij ipan Israel.

Jeroboam amo kinekiyaya maseualmej katli ya kinnauatiyaya ma yakaj kiueyichiuatij Jehová ne Jerusalén, pampa nopaya Roboam tlanauatiyaya. ¿Tijmati kenke amo kinekiyaya? Pampa majmauiyaya, moiljuiyaya ayokmo kitlepanitaskiaj uan sampa kineltokaskiaj Roboam. Yeka kichijchijki ome becerros ika oro uan kiniljuik nopa maseualmej: “Jerusalén tlauel uejka. Nikaj xikinueyichiuakaj ne becerros”. Nochi pejkej kinueyichiuaj nopa becerros uan kitlauelkajkej Jehová.