Itech tonalmej keman Salomón kiueyichiuak Jiova, onkaya yolseuilis itech xolal Israel. Sayoj ke monamiktij iniuan miakej siuamej akin katkaj kayomej itech okseki altepemej uan kinueyichiuayaj tiotsitsin. Yolik, Salomón mopatatiyajki uan no peuak kinueyichiua tiotsitsin. Jiova kualanik uan kiluij: “Nikinkuiliti mochankauan tekiuajyot Israel uan ojkan nikxeloti. Tein okachi ueyi nikmakas semej motekitikauan, uan mochankauan taixyekanaskej sayoj itech tein amo ueyi”.

Jiova kichiuak okse taman tein tapaleuiskia maj nochin okachi kuali kiajsikamatinij tein kijtojka. Jeroboán, se itakeual Salomón, yajtoya okseko uan itech ojti kinamikik tanauatijkej Ahíya. Tanauatijkej kitsayanak itilmaj tein kipiaya tapani uan kisak 12 tilmajkotolmej. Ompa kiluij Jeroboán: “Jiova kinkuiliti tekiuajyot Israel ichankauan Salomón uan ojkan kixeloti. Xikui 10 tilmajkotolmej, porin tiyeski titekiuaj itech 10 uejueyi kalyetouanij”. Keman tekiuaj Salomón kimatik tein panoka, kinekik kimiktis Jeroboán. Yejua ika Jeroboán choloj Egipto. Satepan, Salomón momikilij, uan iokichpil, Rehoboam, peuak tekiuajti. Ijkuak, Jeroboán kinemilij ke ueliskiaya mokepas Israel.

Satepan, tayekananij itech xolal Israel kiluijkej Rehoboam:  “Komo tikinchiuilia tein kuali israelitas, yejuan nochipa mitstakamatiskej”. Sayoj ke itasojikniuan akin iuampoyuan katkaj kiluijkej: “Moneki tikinchikaujkauis. Okachiok xikintekitilti”. Rehoboam kintajtolkakik itasojikniuan. Yejua ika israelitas kiixnamikkej uan kiixtalijkej Jeroboán kemej tekiuaj itech 10 uejueyi kalyetouanij, tein moixmatik kemej tekiuajyot Israel. Tekiuajyot kampa pouiaj okseki ome uejueyi kalyetouanij moixmatik kemej tekiuajyot Judá, uan yejuan nochipa kipaleuijkej Rehoboam. Ijkon moxelojkej 12 uejueyi kalyetouanij itech xolal Israel.

Jerusalén yetoya itech tekiuajyot kampa Rehoboam taixyekanaya, uan Jeroboán amo kinekia maj ixolal ompa yani kiueyichiuati Jiova. ¿Tikmati keyej? Porin mouia maj kiixtopeuanij yejua uan maj kitakamatinij Rehoboam. Yejua ika kinchijchiuak ika oro ome kuakuejkonemej uan kiniluij israelitas: “Jerusalén tel uejka yetok. Okachi kuali nikan ximokauakan uan xikinueyichiuakan nejin kuakuejkonemej”. Israelitas kikakkej uan oksepa kielkaujkej Jiova.