Pa nguva yokuti Soromona wainamata Jehovha, kwainga no runyararo ku Iziraeri. Asi Soromona wakacadha no vanakaji vazinji vanobva ku nyika jimweni zve vakaji vondhovo vainamata zvithombe kana zvidhori. Padoko ngo padoko, Soromona wakacinja zve wakatangavo kunamata zvithombe. Jehovha wakacamwa maningi. Iyena wakati kuna Soromona: ‘VaIziraeri vanozobviswa ku mbhuri yako zve vova majinja maviri. Ndinopa divi rakakura ro umambo ku umwe wo vashandiri vako, zve mbhuri yako inozotonga divi shoma basi.’

Jehovha wakaita kuti zvaainga wakananga zviitike ngo njira imweni. Umwe wo vashandi va Soromona, waidanwa Jerobhoamu paainga eciita hwendo wakasongana no umwe muporofita waidanwa Ahijha. Ahijha paakamuvona wakamukhwederera zve wobata nkhanju yainga nayo zve woimwesa-mwesa ngo zvidimbu zvaikwana kuita 12 zve woti kuna Jerobhoamu: ‘Jehovha anozotora umambo wo Iziraeri kubva ku mbhuri ya Soromona zve waupaura ngo mativi maviri. Torai 10 ro matimbu ngokuti unozova mambo wo 10 ro majinja.’ Mambo Soromona paakazwa izvo wakada kuuraya Jerobhoamu! Asi Jerobhoamu wakatiza kuenda ku Ejipita. Ngo kufamba ko nguva, Soromona wakazofa zve mwana wake Rehobhoamu wakava mambo. Asi Jerobhoamu wakavona kuti apana cokuthya kuti ahwirire ku Iziraeri.

 Vakuru vo ku Iziraeri vakati kuno Rehobhoamu: ‘Kudari ukabata vandhu mu njira yakanaka, ivona vanozova vakatendeseka kwauri.’ Asi shamwari jo majaha ja Rehobhoamu jakati: ‘Unodikana kuengejera muthwaro wo vandhu! Itai kuti vashande maningi!’ Rehobhoamu wakazwira shamwari jake. Iyena wainga no ushati kuno vandhu ngo kudaro vandhu vakamupandukira. Vandhu vakaita kuti Jerobhoamu ave mambo wo 10 o majinja, awo akazozivika inga umambo wo Iziraeri. Majinja amweni 2 akatanga kuzivika inga umambo wo Juda zve akaramba akagondeka kuno Rehobhoamu. Waro 12 o majinja wo Iziraeri ainga apaurana.

Jerobhoamu wainga ecikadi kuti vandhu vake vaende konamata ku Jerusarema, uko kwainga no umambo wa Rehobhoamu. Munozviziva kuti ngenyi? Jerobhoamu waithya kuti vandhu vaizomupandukira votanga kubesera Rehobhoamu. Ngokudaro iyena wakaita maburu maviri o goridhi zve wobvunja vandhu vake kuti: ‘Ku Jerusarema kwaita ndhambo maningi. Munganamatira pano.’ Vandhu vakatanga kunamata maburu o goridhe zve vokanganwazve Jehovha.