Ijkuak Salomón kiueyichiuaya Jehová, israelitas nemiyaj ika yolseuilistli. San ika, Salomón ononamikti imiuan miyekej siuamej akin ualeuayaj oksekan niman kinueyichiuayaj tajtsitsintin. Ika yolik, Salomón onopatlak niman noijki opeuj kinueyichiua tajtsitsintin. Jehová melak okualan. Yejua okijli Salomón: “Nijkuilis mochanejkauan tekiuajyotl ipan Israel niman niktlajkoxelos. Tlen ueyi itech motekiuajyo nikmakas se motlakeual niman mochanejkauan nokauaskej san ika tlen pitentsin”.

Jehová okichiuj itlaj tlen ika teasikamachiltiskia tlen yokijtoka. Se itlakeual Salomón, Jeroboán, ononexti ipan ojtli iuan teotlajtoketl Ahíya. Yejua okikojkoton itlaken, okikixti 12 tlajkotsitsintin, niman okijli Jeroboán: “Jehová kikuilis ichanejkauan Salomón tekiuajyotl itech Israel niman notlajkoxelos. Xkajsi yejuin majtlaktli tlajkotsitsintin pampa tejua titekiuajtis ipan majtlaktli uejueyimej familias”. ¡Ijkuak tekiuaj Salomón okikak yejuin kinekiya kimiktis Jeroboán! Kuakon Jeroboán ocholoj Egipto. Sakin, Salomón omik niman ikoneuj Rehoboam onochiuj tekiuaj. Kuakon, Jeroboán okinemili ika iueliskia nokuepas Israel.

Tlayekankej itech Israel okijlikej Rehoboam: “Tla tejua tikpaleuiya kalpan, yejuamej xkeman mitskauaskej”. San ika,  Rehoboam okinkak telpokamej akin imiuan nouikaya, yejuamej okijlikej: “¡Noneki tikchikajkanotsas kalpan! ¡Xchiualti kalpan chikauak matekiti!”. Rehoboam okinkak telpokamej. Niman opeuj kitlajyouiltia kalpan, kuakon majtlaktli uejueyimej familias okixnamijkej. Yejuamej okichiujkej ika Jeroboán matekiuajti ipan majtlaktli uejueyimej familias, tlen okixmatkej ken tekiuajyotl itech Israel. Okseki ome uejueyimej familias okixmatkej ken tekiuajyotl itech Judá niman xokikaujkej Rehoboam. Ijkon onotlajkoxelojkej 12 uejueyimej familias itech Israel.

Jeroboán xkinekiya ika kalpan makiueyichiuati Jehová ipan Jerusalén, kampa tlanauatiaya Rehoboam. ¿Tikmati tleka? Jeroboán kimojtiaya ika kalpan manokuepa itech Rehoboam niman makipaleui. Yejua okinchijchiuj ome uakaxkokonej tlachijchiujtin ika oro niman okijli kalpan: “Jerusalén melak uejka nokaua. Kuajli tla sa nikan nenkiueyichiuaj uakaxkokonej tlachijchiujtin ika oro”. Kalpan okikak Jeroboán niman oksejpa okilkauj Jehová.