Ge Solomone a be a sa latela melao ya Jehofa, Baisiraele ba be ba phela ka khutšo. Eupša ka morago, Solomone o ile a nyala basadi ba dinageng tše dingwe, bao ba bego ba rapela medimo ya maaka. Ganyenyane-ganyenyane, o ile a fetoga, gomme le yena a thoma go rapela medimo yeo ya maaka. Jehofa o ile a galefa. O ile a botša Solomone a re: ‘Ke tlo go amoga mmušo wa Isiraele gomme ka o aroganya ka diripa tše pedi. Ke tlo nea yo mongwe wa bahlanka ba gago karolo e kgolo, gomme lapa la gago ka le nea karolo e nyenyane.’

Jehofa o ile a dira sona seo. Ka letšatši le lengwe ge Jeroboama, e lego yo mongwe wa bahlanka ba Solomone, a be a le tseleng, o ile a gahlana le moporofeta Ahija. Ahija o ile a gagoganya seaparo sa gagwe ka diripa tše 12 gomme a re go Jeroboama: ‘Jehofa o tlo amoga Solomone mmušo wa Isiraele gomme a o aroganya ka diripa tše pedi. Wena tšea diripa tše lesome ka gobane o tlo ba kgoši ya meloko e lesome.’ Ge kgoši Solomone a ekwa ka se, o ile a nyaka go bolaya Jeroboama! Ka gona Jeroboama a tšhabela Egipita. Ge nako e dutše e eya, Solomone o ile a hwa gomme morwa wa gagwe e lego Rehoboama a ba kgoši. Ka baka leo, Jeroboama a tloga Egipita a boela Isiraele.

Bagolo ba Isiraele ba bolela le Rehoboama ba re: ‘Ge o ka swara batho gabotse, ba tla go kwa.’ Eupša baswa bao e bego e le bagwera ba Rehoboama  ba re go yena: ‘O se ke wa ba theetša! Dira gore batho ba šome ka matla go feta gona bjale!’ Rehoboama o ile a theetša bagwera bao ba gagwe. Ka ge a ile a swara batho gampe, batho ba ile ba mo hloya gomme ba dira gore Jeroboama e be kgoši ya meloko e lesome. Meloko yeo e ile ya tsebja e le mmušo wa Isiraele. Meloko e šetšego e mebedi e ile ya tsebja e le mmušo wa Juda, gomme batho ba yona ba tšwela pele ba latela Rehoboama. Gona bjale meloko e 12 ya Isiraele e be e arogane ka diripa tše pedi.

Jeroboama o be a sa nyake gore batho ba gagwe ba yo rapela Jehofa kua Jerusalema, ka ge Jerusalema e be e le nageng yeo e bušwago ke Rehoboama. Na o a tseba gore ke ka baka la eng Jeroboama a be a sa nyake batho ba gagwe ba eya moo? Ke ka gobane o be a tšhaba gore batho bao ba tla mo hlanogela gomme ba thekga Rehoboama. Ka gona o ile a dira dinamane tše pedi tša gauta gomme a botša batho ba gagwe a re: ‘Le se ke la ya Jerusalema ka gore ke kgole. Rapelang Modimo gona mo.’ Ke moka batho ba thoma go rapela dinamane tšeo tše pedi tša gauta gomme ba lebala Jehofa gape.