Obu Sulemaani yaabaire naaramya Yehova, hakaba hariho obusingye omuri Israeli. Kwonka Sulemaani akashwera abakazi baingi kuruga omu mahanga agandi, kandi abakazi abo bakaba nibaramya ebishushani. Mporampora, Sulemaani akahinduka, kandi nawe yaatandika kuramya ebishushani. Eki kikagwisa kubi Yehova. Akagambira Sulemaani ati: ‘Israeli neija kwihwa omuka yaawe kandi ebaganisibwemu kabiri. Niinyija kuha omwe aha baheereza baawe ekicweka kihango, kandi eka yaawe neija kutegyeka ekicweka ekikye.’

Yehova akooreka gye eki yaacwiremu omu muringo ogundi. Omwe aha baheereza ba Sulemaani, Yeroboamu, akaba ari omu muhanda naagyenda yaabugana nabi Ahiya. Ahiya akatagatagura omu kijwaro kye obucweka 12 kandi yaagambira Yeroboamu ati: ‘Yehova naija kwaka eka ya Sulemaani Obugabe bwa Israeli kandi abubaganisemu kabiri. Twara obucweka 10 ahakuba noija kuba omugabe w’enganda ikumi.’ Omugabe Sulemaani akamanya ebyabaireho kandi akaba naayenda kwita Yeroboamu. N’ahabw’ekyo Yeroboamu akahungira Misri. Ku haahingwireho obwire, Sulemaani akafa kandi omutabani Rehoboamu akaba omugabe. Bwanyima Yeroboamu akamanya ngu naabaasa kugaruka Israeli.

 Abakuru ba Israeli bakagambira Rehoboamu bati: ‘Ku oraatwarize gye abantu, nibaija kukworobera.’ Kwonka banywani ba Rehoboamu abatsigazi bakamugira bati: ‘Oine kutwariza kubi abantu. Kandi baine kukora munonga.’ Rehoboamu akakuratira obuhabuzi bwa banywani be abatsigazi. Akatwariza kubi abantu, kandi bakamugomera. Bakahindura Yeroboamu omugabe w’enganda ikumi, ezamanyirwe nk’obugabe bwa Israeli. Enganda ibiri ezindi zikaba obugabe bwa Yuda, kandi bakoorobera Yeroboamu. Enganda 12 za Israeli zikabaganisibwamu.

Yeroboamu akaba atarikwenda ngu abantu baze Yerusaalemu kuramya, ahabw’okugira ngu ekaba eri omu bugabe bwa Rehoboamu. Noomanya ahabw’enki? Yeroboamu akatiina ngu abantu bakaba nibaza kumurugaho bashagike Rehoboamu. N’ahabw’ekyo akakora ebishushani bibiri by’enyana omu zaabu, reero yaagambira abantu ati: ‘Nimwija kuruha kuguma nimuza Yerusaalemu. Nimubaasa kuramiza aha.’ Abantu bakatandika kuramya ebishushani by’enyana kandi bakagaruka baayebwa Yehova.