Pa ri tiempo che Salomón xuqʼijilaj ri Jehová, xkʼojiʼ jamaril pa Israel. Are kʼu areʼ xkʼuliʼ kukʼ kʼi ixoqibʼ re nikʼaj chik nimaʼq taq tinamit xuqujeʼ kekiqʼijilaj e tyoxabʼ. Nojimal, nojimal, Salomón xukʼex ri ubʼantajik xuqujeʼ xumaj uqʼijilaxik e tyox. Jehová xpe royowal rukʼ xuqujeʼ xubʼij che: «Kwesaj ri ajawbʼal re Israel che ri afamilia xuqujeʼ kinbʼan na kebʼ che. Ri más nim kinya che jun chke ri awajpatanelabʼ, e ri afamilia kajawin pa uwiʼ ri nitzʼ».

Jehová xubʼan chi jun jastaq rech konojel kkichʼobʼ ri xubʼij. Jun rajchak ri Salomón, ubʼiʼ Jeroboán, bʼenaq pa ri bʼe xkiriq kibʼ rukʼ ri ajqʼaxal tzij Ahíya. Ri ajqʼaxal tzij xresaj ri ratzʼyaq xuqujeʼ xubʼan pa 12 chʼaqataʼq che. Tekʼuriʼ xubʼij che Jeroboán: «Jehová kresaj ri ajawbʼal che ri ufamilia ri Salomón xuqujeʼ kubʼan na kebʼ che. Chakʼamaʼ 10 chʼaqataʼq che ri atzʼyaq, rumal che katux ajawinel pa uwiʼ ri 10 tribus». Are chiʼ ri ajawinel Salomón xuta chrij ri xkʼulmatajik, xraj xukamisaj ri Jeroboán. Rumal laʼ ri Jeroboán xanimaj bʼi pa Egipto. Chiʼ xqʼax ri tiempo, Salomón xkamik, are chi ri ukʼojol Rehoboam xumaj ajawinik. Tekʼuriʼ Jeroboán xuchomaj che xqʼax ri kʼax, xtzalij pa Israel.

 Tekʼuriʼ, ri ajkʼamal bʼe re Israel xkibʼij che Rehoboam: «We kabʼan ri utz che ri tinamit, ri tinamit kux sukʼ chawe». Are kʼu ri e rachiʼl che majaʼ nim kijunabʼ xkibʼij che: «Rajawaxik che ko kattakʼiʼ chkiwach ri tinamit. Cheʼataqchiʼj che kechakun más». Rehoboam xubʼan ri xkibʼij ri e rachiʼl che, xux itzel. Rumal laʼ ri winaq xkinimaj ta chik are chi xkikoj ri Jeroboán che ajawinel pa uwiʼ ri 10 tribus. Ri ajawbʼal rech 10 tribus xbʼix ajawbʼal re Israel che. Che ri ajawbʼal rech ri e kebʼ tribus xbʼix ajawbʼal re Judá che, xuqujeʼ xux sukʼ che Rehoboam. Jeʼ wariʼ xjach uwach ri 12 tribus re Israel.

Jerusalén kʼo pa ri ajawbʼal re Rehoboam. Jeroboán kraj taj che ri utinamit kbʼe chilaʼ che uqʼijilaxik ri Jehová. ¿La awetaʼm jasche? Rumal che kuxibʼij ribʼ che kxutuxik are chi knimax ri Rehoboam. Rumal laʼ xubʼan kebʼ alaj taq amaʼ wakax re qʼan pwaq tekʼuriʼ xubʼij che ri tinamit: «Jerusalén sibʼalaj naj kʼo wi. Are utz che kixkʼojiʼ waral keʼiqʼijilaj ri e alaj amaʼ taq wakax re qʼan pwaq». Ri winaq xkibʼan ri xubʼij chke, jumul chik xkiya kan ri Jehová.