Salomón Jehovata adorashpa causacun punllacunapica Israel llajtapica cushi causaimi tiyarca. Pero paica shujtaj llajtamanta huarmicunahuanmi cazararca. Paicunaca yanga dioscunatami adorajcuna carca. Salomonca asha ashami chai dioscunata adorai callarirca. Diosca pꞌiñarishpami paitaca, ‘Israelpi mandanataca cambaj familiamanta quichushpami ishquipi chaupisha. Ashtahuan jatun partetaca canta sirvijmanmi cusha. Cambaj familiaca uchilla partellatami mandanga’ nircami.

Qꞌuipaca Diosca pai nishcata tucuicuna intindichunmi caita rurarca. Salomonta sirvij Jeroboam (Jeroboán) shuti runami ñanta ricushpaca Ahias (Ahíya) shuti profetahuan tuparca. Chai profetaca jahua churanata surcushpami 12 partecunapi lliquishpa Jeroboamtaca, ‘Jehová Diosca Israel mandanataca Salomonpaj familiamanta quichushpami ishquipi chaupigrin. Cai chunga partecunaca cambajmi. Chunga aillucunatami canca mandangui’ nircami. Salomón chaita yachaj chayashpami Jeroboamta huañuchisha nirca. Jeroboamca Egiptomanmi miticushpa rirca. Qꞌuipaca Salomón huañujpica paipaj churi Roboammi (Rehoboam) mandai callarirca. Chaipimi Jeroboamca ña mana manchashpa Israelman tigrarca.

 Israelpi tiyaj cunaj yayacunaca Roboamtaca, ‘israelitacunapaj allita rurajpica cantaca cazungacunami’ nircacunami. Pero Roboampaj joven amigocunaca, ‘israelitacunataca llaquichinami cangui. Ashtahuan sinchitami trabajachina cangui’ nircacunami. Paipaj amigocuna nishcata uyashpami gentecunataca llaquichirca. Chaimi gentecunaca Roboamta mana cazushpa 10 aillucunata Jeroboam mandachun churarcacuna. 10 aillucunataca Israel llajta nishpami shutichirca. Roboamta cazuj ishqui aillucunataca Judá llajta nishpami shutichirca. Chashnami Israelpi tiyaj 12 aillucunaca chaupirircacuna.

Jerusalenca Roboam mandacuj llajtapimi carca. Jeroboamca israelitacuna Jerusalenpi Jehovata adoranaman richunca mana munarcachu. ¿Imamanta? Jeroboamca gentecuna paita mana cazushpa Roboamta cazunatami mancharca. Chaimantami ishqui curi bizicunata rurashpa israelitacunataca, ‘Jerusalenca yalli carumi. Caillapitaj cai curi bizicunata adoraichijlla’ nircami. Israelitacunaca pai nishcata cazushpami Jehová Diosta cutin cungarircacuna.