Jehova Diosta Salomon yupaychaptinqa Israel runakunam hawka karqaku. Ichaqa huk law nacionniyuq achka warmikunawan Salomon casarakuruspanmi, taytacha-mamachataña paypas yupaychayta qallaykurqa. Chaymi Diosqa piñakuruspan Salomonta nirqa: “Kamachisqayki naciontam rakisaq, hinaspam serviqnikiman qusaq. Serviqnikim achkallaña Israel runakunata kamachinqa, churikiñataqmi aschallataña”, nispa.

Chayna kananmantam Jehova Diosqa paymanta willakuq Ahiaswan, Salomonpa serviqnin Jeroboanman willachirqa. Jeroboanmi Ahiaswan ñanpi tuparurqa, hinaptinmi Ahiasqa capanta chunka iskayniyuqman llikiruspa nirqa: “Salomonpa kamachisqan naciontam Jehova Dios iskayman rakinqa. Hapiy chunkaman llikisqayta. Qanmi 10 ayllukunata kamachinki”, nispa. Chayta yacharuspanmi Salomonqa Jeroboamta wañuchiyta munarqa, chaymi Jeroboamqa Egiptoman ayqikurqa. Salomon wañukuptinñataqmi churin Roboamña kamachiyta qallaykurqa. Jeroboampas Israel nacionmanmi kutiramurqa.

 Chaymantam Diospa llaqtanpi punta apaqkuna Roboamta kaynata nirqaku: “Sichum kay runakunata sumaqllata kamachiptikiqa kasusunkim”, nispa. Ichaqa wiñaymasinkunata kasuspam Roboamqa runakunata llumpayta ñakarichirqa, chaymi piñakuruspanku Jeroboamtaña akllarurqaku 10 ayllukunata kamachinanpaq. 10 ayllukunatam suticharqaku Israelwan, iskay ayllutañataqmi Judawan. Chay iskay ayllullañam Roboamtaqa kasukurqaku. Chaynapim 12 ayllukunaqa rakinakururqa.

Roboanmi chay iskaynin aylluta Jerusalenmanta kamachirqa. 10 ayllukunata kamachiq Jeroboamñataqmi piensarqa runankuna manaña payta kasunankuta, chaymi Jerusalenman rispa Diosta yupaychanankuta manaña munarqachu. Hinaspanmi iskay torokunata qurimanta ruwaruspan nirqa: “Jerusalenqa karu-karuraqmi, aswan allinqa kayllapiña kay torokunata yupaychaymi”, nispa. Runakunañataqmi Jeroboamta kasuspa Jehova Diosta qunqarurqaku.