Dži o Solomon služindža e Jehovase, ko Izrael hine mir. Ama, o Solomon ljelja pese but romnjen ando avera phuvja hem odola romnja služindže e idolendže. Hari po hari, o Solomon menindža pe hem počmindža te služini e idolendže. Odoljese, o Jehova holjandža upro oljeste. Ov phendža e Solomonese: „Ka lav o Izrael andi ti porodica hem ka delinav lje ko duj delija. O pobaro deo ka dav jekhe te slugase, a ti porodica ka vladini samo ko jekh potikno deo.“

O Jehova hem ko aver način mothovdža so čače ka čerel odova. Jekh e Solomoneso sluga, o Jerovoam, dži dželo ko drumo reslja e proroko, e Ahija. O Ahija pharavdža po ogrtači ko 12 kotora hem phendža e Jerovoamese: „O Jehova ka ljel o kraljevstvo Izrael andi Solomonesi porodica hem ka delini lje ko duj delija. Lje deš ando akala kotora sose tu ka ove kralj upro deš plemenija.“ Ked šundža o Solomon akava, manglja te mudari e Jerovoame! Odoljese o Jerovoam našlja ko Egipat. Palo nesavo vreme, o Solomon mulo, a oljeso čhavo, o Rovoam, ulo kralj. O Jerovoam dikhlja so šaj te irini pe paljem ko Izrael.

 O starešine ko Izrael phendže e Rovoamese: „Ako hijan šukar e manušencar, on ka oven tuče verna.“ Ama, oljese poterne amala phendže ljese: „Mora te ove strogo e manušencar! Čhiv ljen te čeren pana pophari buti!“ O Rovoam šundža oljengo savet. Ov ponašindža pe lošno e manušencar hem odoljese on bunindže pe protiv oljeste. On čhivdže e Jerovoame te ovel kraljo upro deš plemenija kola ulje pendžarde sar kraljevstvo ando Izrael. O avera duj plemenija ulje pendžarde sar kraljevstvo andi Juda hem ačhilje verna e Rovoamese. Adžahar o 12 plemenija ando Izrael hine delime.

O Jerovoam na manglja oljeso narodo te džal ko Jerusalim te služini e Jehovase, sose o Jerusalim hine deo ando e Rovoameso kraljevstvo. Ov darandilo so o narodo ka cidel pe oljestar hem ka ovel andi e Rovoamesi strana. Odoljese, čerdža duj zlatna telcija hem phendža peklje narodose: „O Jerusalim tano but dur. Akate služinen e Devljese.“ O manuša počmindže te služinen e zlatno telconendže hem paljem bisterdže e Jehova.